Ariel

Familietreff på Hareid

2012-01-28T21:56:00.000+01:00

I høve Nevø 3 sin 18-årsdag 18. januar samla vi oss til utsett feiring på Hareid i dag. Eg hadde med alle mine fire, besteforeldra var der og Hareidsgjengen var representert med fire. Dei seks barnebarna sat samla ved bordet i stova, medan den eldre garde sat på kjøkenet, og vi fekk servert nydeleg kjøtsuppe, karamellpudding og marengs/bær-dessert. Seinare fekk vi dessutan kaker og rundstykke, så det var ingen grunn til å reise svoltne heim.

Vi takkar for laget for denne gong!

Bok 6 2012: "Uke 43" av Hanne Ørstavik

2012-01-26T22:04:00.000+01:00

Denne boka likte eg godt. Det var lett å leve seg inn i hovudpersonen sine tankar og kjensler - ikkje fordi ho er lik meg, men fordi ho lever i eit akademisk, intellektuelt univers eg kan forstå.

Hovudpersonen er litt over 30 år, velutdanna og singel. Ho skal undervise om litteratur på ein distriktshøgskule, og på ein måte blir ho tiltrekt både av studentane og av kollegaen Hilde. Den sistnemnde blir etter kvart svært viktig for hovudpersonen Solveig, og ho gjer mykje for å tekkjast den eldre kollegaen, som å bake, kjøpe presangar o.l. Eg skal ikkje røpe slutten, men berre kommentere at noko som kan verke som ein bagatell for ein utanforståande, vert avgjerande. For oss som er levande opptekne av film og litteratur, er det heilt forståeleg.

Av negative trekk ved romanen må eg få nemne at dei detaljerte skildringane av korleis ein lagar te eller går på toalettet verkar noko påtrengande. Knausgård hadde òg ein del slike trivielle skildringar, så det er kanskje greitt i dagens litteratur. Eg likar det ikkje.

Beslutningsvegring? Nei takk!

2012-01-26T17:20:00.000+01:00

I dag var eg i modus for møbelshopping. Eigentleg hadde eg ikkje så mykje tid til rådvelde, men eg kunne alltids kike litt. Eg har trass alt sett ein del på internett og i brosjyrar, så tankeprosessane har vore i sving lenge.

Etter 25 minutt inne i forretninga hadde eg bestilt to sofaer (Ekornes Oslo i fargen svart batick), eit gedigent spisebord ( av typen "Octan"; 380 cm når alle fire ekstraplatene er i), dei tilhøyrande 14 stolane ("Malou"), kjøkenbord med fire stolar i liknande stil ("Arlington") og eit vitrineskap ("Vincent"). Alt skal leverast på døra når eg ein gong får vaska ned etter oppussinga.

Det er dessverre stillstand i prosessen på grunn av mangel på lister og plater, men shopping er òg ein del av arbeidet som skal gjerast.

Kan lukka kjøpast for pengar?

2012-01-25T19:11:00.000+01:00

Det beste i livet er gratis, seiest det, men av og til kan ein kjøpe glede. Eller bestille noko som gleder ein når det kjem i postkassa.

Eg er ivrig kunde på CDON, og i dag kom det både musikk, film og bok derifrå. Eg har likt bandet Whitesnake sidan tidleg på 80-talet, og no har eg kjøpt tre CD-ar som eg anten har hatt før eller har hatt på vinyl. Spesielt godt likar eg plata "Ready an' willing", som er langt meir bluesprega enn dei seinare platene. Filmen "Mississippi Burning" brukte eg ein del i undervisninga på tidleg 90-tal, og no har eg tenkt å børste støvet av den i samband med ei fordjuping i emnet borgarrettskamp i USA og Sør Afrika. Oppskriftsboka (eg veit ikkje kvifor det biletet vert liggande, ikkje ståande) var eit bonustilbod eg ikkje kunne seie nei til, og eg treng ei fornying av kokkekunstane mine (eller dei manglande sådanne).

Som om ikkje dette var nok, kom eit flunkande nytt interiørblad i posten òg. Eg har ikkje tenkt å kopiere stilen frå desse blada, men for første gong på fleire år synest eg det er spennande med interiørtips.

Eg får truleg ein roleg kveld.

Effektiv fri-onsdag

2012-01-25T18:53:00.000+01:00

Etter ein noko treg start kom eg meg i sving med vaskekost, klesvask og rydding. Ungane forventa pannekaker til middag, og det vart det tid til etter at huset var ferdig rydda og vaska. Skulearbeidet tok eg langsmed resten; eg les ein roman som eg har lese to gonger tidlegare saman med gruppa i internasjonal engelsk, og det kjennest ikkje akkurat som nokon slitsam jobb å friske opp minnet.

Det bles ganske heftig ute i dag, så nokon tur saman med ungane vart det ikkje. Dei to små hadde fri, og eg jaga dei ut for å leike medan eg vaska. Det er kjekkast å vaske når ein er aleine, for det blir ofte merke etter små føter som ikkje greier å vente til golva er tørre.

Minstemann skulle i selskap i eit par timar på ettermiddagen, og den tida nytta eg til å handle og å gå tur i halvannan time (medan eg høyrde på lydbok, sjølvsagt).

Då eg kom heim, var det allereie mørkt, men klokka var berre litt over 18.00. No ser eg fram til å bruke kvelden til rolege innesyslar saman med ungane - både dei og eg har travle kvardagar og set pris på slike fridagar innimellom.

Bok 5 2012: "Noen kommer, noen går" av Anne B Ragde

2012-01-23T20:44:00.001+01:00

Eg har tidlegare lese ein kriminalroman av Ragde med tittelen "Lille Petter Edderkopp", og den fann eg temmeleg føreseieleg og litt "gymnasiastaktig" i stilen. Den boka eg no har lese, er ei samling noveller av svært varierande kvalitet, og der dei fleste kan karakteriserast som føreseielege og "gymnasiastaktige". Dei overraskande sluttpoenga var langt frå overraskande - spesielt dei av novellene som hadde eit sluttpoeng av typen "det mordaren ikkje tenkte på".

Eg har lese mykje krim, og det bør vere god krim dersom eg skal like den. Denne samlinga var totalt uinteressant etter min smak.

Skifri søndag

2012-01-22T18:00:00.001+01:00

I dag hadde nokon sanda den glatte vegen, men dei to yngste ungane ville likevel på sparktur med hundane. Det hadde vore så artig laurdag, nemleg. Og det var faktisk godt sparkeføre, trass sanden. I alle fall med to bustete motorar.

Metoden vår er følgjande: Gamla går/joggar i førevegen medan born og hundar vert ståande att. Gamla snur seg og plystrar på hundane, som tek av og spring fort bort til henne. Full fart og mykje moro, med andre ord.

Vel attende frå turen fekk vi servert "ballj" (raspeball), og det førte sjølvsagt til at somme av oss åt for mykje. Hundane la seg rett ned, og Minstemann hevda dei kjeda seg. Eg har ein annan teori om akkurat det.

Resten av kvelden vil gå med til skulearbeid, kaffidrikking og kanskje litt film og/eller tv. Storegut er i Volda i høve konfirmasjonsførebuinga, så eg har ein sjåførjobb i vente, men elles blir det lite og inkje gjort av fornuftige gjeremål, kjenner eg.

Tur med Tarzan

2012-01-21T15:05:00.000+01:00

Storegut skulle tilbringe laurdagen saman med fotball-laget på cup i Måløy, og Barnefaren ville få unna noko arbeid i nyehuset (listing, for det meste). Dei to yngste og eg tok oss ein tur med sparkstøtting, akebrett og to glade hundar innover Geislida. Det var god glid på dei glatte vegane, og hundane heldt høgt tempo då dei drog ungane etter seg. Det er ein fantastisk fin vinterdag, så vi burde kanskje ha fare på ein lengre tur, men Veslejenta skal i bursdagsselskap. Uansett er eg glad for at det skjer ting i huset, og at den prosessen snart kan bli ferdigstilt. Det som irriterer oss litt no, er at vi ikkje har alt vi treng av material for å få det heilt ferdig allereie no i helga.

Vinklubb i januar: den nye vinen

2012-01-21T11:48:00.002+01:00

Fredag kveld møttest ni blide damer til vinklubb. Det er ei stund sidan sist, sidan førejulstida ofte er for hektisk for slik aktivitet. Samtaletemaa var mange og varierte, som vanleg, men juleorkanen Dagmar var sjølvsagt mykje omtala.

Det "faglege" temaet for dagen var nye vinar på Vinmonopolet, ein kvit og to raude. Alle tre smakte svært godt både før, under og etter maten, og vi hadde ein vellukka kveld saman - som vanleg.

For å seie det med "Gitarkameratene":

Hver gang vi møtes har vi det bra

Vi er venner for livet, sånne er gode å ha

Bok 4 2012: "Øst for Eden 1" av John Steinbeck

2012-01-19T23:06:00.001+01:00

Denne gamle klassikaren er verkeleg verd å lese. Steinbeck er ein stor forteljar; kvar minste biperson får fortalt livshistoria si på ein måte som gjer at nokre få linjer femnar om ein heil roman, og ein får både sympati og antipati med karakterane etter kvart som dei dukkar opp. Persongalleriet er stort, men karakterane festar seg, om ein kan seie det slik. Nokre er eintydig gode, andre direkte vonde, men klisjéaktig blir det likevel ikkje. Eg har allereie bestilt filmen, og no ser eg fram til å lese del 2, som filmen i hovudsak er basert på.

Ganggolvet der heime

2012-01-19T09:03:00.000+01:00

Fri-onsdagen forsvann i skulearbeid (= lese roman) og husarbeid (=klesvask, rydding, matlaging). Regnet gjorde det lite freistande å gå tur, så Minstemann og eg droppa utelivet. Dei to mellomste fekk, som vanleg på onsdagar, servert ferdig middag med det same dei kom frå skulen. Denne luksusen set dei stor pris på, og vi får som regel ei hyggeleg stund ved middagsbordet, der dei fortel om skuledagen sin. Etter middag vart det god tid til lekser, før vi for på fotballtrening. Alle ungane trena, medan eg var på foreldremøte i fotballgruppa. Etter treninga var det min tur å mosjonere; eg lufta hundane medan ungane slappa av i heimen.

Barnefaren brukte ettermiddagen/kvelden til å legge golv i gangen og på nesten heile rommet til Eldstejenta i nyehuset. Vi var innom og såg etter treninga, og det blir skikkeleg fint. Bileta vart sende til meg på mail etter endt arbeidskveld - litt av ein luksus, må ein vel seie.

Snikkaren meiner at golvet er litt kjedeleg av utsjånad, men eg trur "eik" vil passe godt saman med dei møblane eg har planar om å kjøpe. Ein av mine gode eigenskapar, i følgje meg sjølv, er at eg vert nøgd med dei avgjerdene eg tek. I alle fall når det gjeld interiør.

Bok 3 2012: "Over alle verdens makter og myndigheter" av Jack Cavanaugh

2012-01-17T20:00:00.003+01:00

Tredje bok i trilogien til Cavanaugh handlar om nokre av dei same personane som vi har møtt i dei to tidlegare bøkene. Dei fleste av dei endar opp i Aust-Berlin, og mykje av handlinga dreiar seg om fluktforsøk over muren mot Vest-Berlin. Mur-tida i Berlin er noko eg godt kunne ha tenkt meg å lese meir om, og ikkje minst skilnadene mellom dei to samfunna og personlege konsekvensar av delinga av Tyskland. Denne boka gav noko innsyn i problematikken, men eg saknar meir faktakunnskap. Etter å ha lese alle tre bøkene, konkluderer eg med at dei var ok, men ikkje akkurat stor litteratur heller. Noko er føreseieleg, komposisjonen er tradisjonell og språket er heilt ordinært. Det er først og fremst temaa som fangar mi interesse, og eg skal prøve å finne betre bøker om Tyskland under og etter krigen ved eit seinare høve.

"Jeg maler og jeg maler, og det blir så fint og flott" (og grått)

2012-01-16T20:41:00.000+01:00

På grunn av før nemnde datavanskar vert det ikkje lagt inn bilete av dagens oppussingsinnsats, som eg forresten var ansvarleg for sjølv. Ikkje det at det viser så godt heller - det var berre eit nytt strøk måling på badet. Det første strøket med grått var litt skjoldete, og taklistene trengde meir enn eitt strøk. No håpar eg at det held med to, men er budd på at det kan bli noko meir flikking.

Av andre oppussingsnyhende kan eg nemne at eg i dag kjøpte laminatgolv til gangen og soverommet oppe - dei to romma som har fått kvite panelvegger. Det blir fantastisk fint, synest eg sjølv, og det blir kjekt å bli ferdig med saging og roting såpass eg får begynne å vaske ned og skaffe meg møblar.

Slappfiskar og laks

2012-01-16T20:26:00.001+01:00

Søndag skulle Veslejenta i bursdagsselskap. Vi hine hadde ein roleg inne-dag med sein frokost og lite program. På menyen stod Gamlas sjølvkomponerte rett "pestolaks" (laksefiletar med pesto på, steikt i omnen), og så gjekk eg ein lang tur om kvelden md lydbok på øyret.

Datamaskina mi kræsja igjen, for tredje gong sidan 1. juledag, noko som gjorde meg ute av stand til å sjekke jobb-sidene før karakteroppgjeret måndag. Eg hadde heldigvis gjort unna all karakterføring tidlegare i veka for å unngå stress, noko eg absolutt ikkje angra på.

Utsikt heimover

2012-01-14T17:58:00.002+01:00

Sist helg var eg inne nesten heile tida, på grunn av innearbeid og ein gut med øyreverk. I dag ville eg ut på tur, og det vart til at dei to små og eg tok med hundane i skogsvegen. Der var litt snø på vegen, noko hundane sette stor pris på. Veslejenta hadde med hundesnop i ein pose, så vi underheldt oss sjølve og hundane med å få dei til å springe mellom oss dersom ein av oss gjekk eit stykke i førevegen.

Storegut hadde i utgangspunktet tenkt seg ei roleg helg, men det vart bandøving til langt på kveld i går kveld, studioopptak med bandet i føremiddag og fotballtrening no om ettermiddagen/kvelden. Alle slike avtalar inneber ein del kjøring for meg, men eg gjer det så gjerne når han vil vere med på noko positivt i fritida.

Eldstejenta er på russetur til Bjorli denne helga, og rapportane derifrå tyder på at ho har det heilt hivens.

Min plan for kvelden er å kose meg saman med ungane, kanskje sjå ein film eller lese i ei god bok. Favorittsysselen for tida er å høyre lydbok samtidig som eg ser på møblar på internett...

Ferdig plata!

2012-01-14T17:34:00.000+01:00

Barnefaren heldt på til langt på natt fredag kveld, og laurdag morgon tok han turen inn i "nyehuset" og la ferdig panelplatene på gangen. Han har brukt om lag 50 stk på dei to romma, og det har gått i eit imponerande tempo. Då vi var innom i 13-tida laurdag, begynte han å måle vinduskarmen i gangen. Måndag skal eg kjøpe golv, og så får vi sjå kva tid det blir tid for golvlegging. Dersom ein slepp å mødest, går det rimeleg kjapt. Når grovarbeidet er over, kan eg begynne å vaske vekk støvet som har samla seg etter all saginga.

Oppussing by proxy

2012-01-13T22:48:00.000+01:00

I dag har eg hatt det fint. Dei to små og eg har kosa oss i heimen heile ettermiddagen/kvelden medan MMS-ane med bilete av oppussinga tikka inn. I kveldinga kjørte eg av stad for å hente Storegut på bandøving, og då fekk eg sjå resultatet "live". Rommet til Eldstejenta er no ferdig panelert, og i 22-tida var ein vegg + litt til i gangen også kledd med eggekvite plater. Hjelparen er iherdig og flink, så det går raskt og relativt problemfritt. Nokre problemområde må juksast litt på, det skal leggast lister både i tak og ved golvet og ein vinduskarm skal målast, så det blir noko flikking og slikt som tek tid og ikkje viser så godt att som denne prosessen, men det er likevel utruleg at vi starta prosessen for berre ei veke sidan. Eg synest det blir kjempefint, og det kjennest meir som heime for kvar gong eg kjem inn i huset. Det er eit godt teikn!

Resultatet av platelegginga så langt

2012-01-13T08:33:00.001+01:00

Sidan ungane og eg returnerte til heimen før prosessen var over, har eg fått tilsendt bilete tekne med mobil av den gode hjelparen seint torsdag kveld. Tre av veggene på rommet til Eldstejenta er no ferdige.

Ferdigmåla veggplater - like genialt og enkelt som det ser ut?

2012-01-12T21:02:00.002+01:00

Eigentleg likar eg godt ein gamaldags stil i interiøret, så perlefasa panel er midt i blinken. For nokre år sidan kom det plater med ferdigmåla panel på i handelen, og no har eg kjøpt inn slike plater for å forvandle eit soverom og ein gang til lyse, einsfarga rom. Fargen er nesten kvit, sameleis som på stova/kjøkenet, men med smalare "fjøler". Golva på dei same roma skal leggast nytt laminatgolv på, og eg har teke ut eit som liknar på stovegolvet, men i ein varmare tone (eikefarga). Dagens bilete viser romma slik dei såg ut då listene, lysbrytarar o.l. var fjerna.

Roleg fri-onsdag

2012-01-11T21:29:00.001+01:00

Når planane er få, blir dagane ofte lange og innhaldsrike. I dag hadde eg ingen andre planar enn å hente ein kompis av Minstemann og å steike pannekaker til gjengen. Det fekk eg sjølvsagt gjort, og i tillegg fekk eg styra mykje i huset medan gutta kosa seg med "frileik". Ute regna det og bles, så det freista ikkje med uteliv.

I kveldinga sette eg meg til med skulearbeid. I dag ville det seie å lese tre kapittel i ein roman og å sjå gjennom ein film. Eg har både lese boka ("Slumdog Millionaire") og sett filmen ("Rabbit Proof Fence") eit par gonger tidlegare, men det er greitt å friske opp litt. Ikkje minst boka, som vi skal gå gjennom spørsmål til i morgon tidleg.

Av og til er grensa mellom jobb og fritid ganske så flytande, og eg føler meg privilegert som kan kose meg slik med jobbinga.

Bok 2 2012: "Hans voktende øye" av Jack Cavanaugh

2012-01-10T20:40:00.000+01:00

Dette er den andre boka i serien "Sanger i natten", og eg er framleis skeptisk til sjangeren "kristen litteratur". Innhaldet i boka dreiar seg mykje om krigen sett frå ikkje-nazistiske tyskarar sin synsvinkel. Kva vil det seie å gjere det rette i den vanskelege situasjonen dei lever i? Er det alltid gale å ta liv? Skal ein setje eige og andre sine liv i fare for å gjere det moralsk rette? Spørsmåla er mange, og svara er slett ikkje overflatiske. Boka er god den, men mot slutten, dvs den siste cd-en, vert den kristne bodskapen etter mitt syn noko påtrengjande.

Mulligatawnysuppe på søndag

2012-01-08T21:19:00.000+01:00

I dag fekk Minstemann og eg nok ein roleg dag, sidan han framleis slit med det eine øyret. Han har greidd seg utan smertestillande, og han har ikkje sove i løpet av dagen, så i morgon skal han på skulen som normalt.

Eg er ikkje så glad i å vere inne, i alle fall ikkje i nydeleg vintervêr som det vi hadde i dag. Då var det ei viss trøyst i at resten av gjengen hadde ein strålande dag - dei to mellomste på Reset saman med Barnefaren, og Eldstejenta på TREN før ho vart med hit.

Dagens eksperiment var å lage Mulligatawnysuppe, etter oppskrifta på side 39 i "Smalhans". Eg triksa litt med ingrediensane; la til litt meir gulrot og tomat, droppa kvitlauk, brukte litt anna krydder og nytta kyllingkjøtdeig i staden for kyllingfilet. Det er langt billegare, faktisk veldig billeg, men vanlegvis synest eg den er så smaklaus at den ikkje kan brukast anna enn i svært krydra sausar o.l. I suppa gjekk det fint med kjøtdeig, men eg tok litt ekstra hønsebuljong for å få meir smak på krafta. Eg kokte ikkje ris attåt, men varma ein pose "boil-in-bag"-fullkornris og hadde den oppi suppa. Det gjekk heilt fint.

Suppa fall i smak, men gjengen var så svoltne at dei sikkert hadde ete kva som helst. Eldstejenta måtte få med seg ein supperest i eit tomt sylteglas heim til hybelen - eg håper ho ikkje sølte altfor mykje.

Etter middag rydda vi matbod (ok, vi fann noko snop vi hadde gløymt der) og spelte brettspel før eg kjørte Eldstejenta på kaia. Det var kjekt å spele brettspel utan at straumen var borte...

Laurdagskveld på badet

2012-01-07T23:50:00.000+01:00

Innsatsvilje og pågangsmot må til, men så blir det også eit resultat eg blir strålande nøgd med. Ikkje alt arbeid ein slit med er like synleg! Eg har nemleg tilbragt laurdagskvelden aleine på badet med ei spann måling i fargen "Skagen". Det er den same fargen som foreldra mine brukte i sokkelleilegheita då dei pussa opp, og som eg deretter valde til "nedebadet" i min tidlegare heim. Den kan skildrast som gråbeige. Eg likar både fargen og resultatet elles, men armar, nakke og hovud treng å halde kviledagen heilag i morgon.

Alle de andre har dratt avsted, uten at han fikk bli med...

2012-01-07T16:32:00.000+01:00

Dagen i dag skulle gå med til lang tur i skogen med hundane og eit strøk grått på badet i nyehuset. Ein telefon i gryotta sette stopp for planane: Minstemann var dårleg og kunne ikkje vere med til skitrekket saman med resten av gjengen. Barnefaren skulle vere vakt denne helga, og dei to mellomste ungane fekk ta med seg ein kompis og ei venninne.

Guten kom i hus, la seg i senga og somna. Seinare har han vore vaken, men han er verkeleg "pjask".

Eg hadde eit lite ærend på butikken, og då fekk han lov å ta med ein seddel han fekk med onkel-familien til bursdagen sin. For nokre av pengane kjøpte han seg ei øskje med Lego - som om han ikkje har nok av denslags frå før...?

Vi har hatt ein stille og roleg dag, som de sikkert skjønar. Eg har fått unna noko klesvask, lese i bok og surfa på nettet. Minstemann har som nemnt sove, bygd lego og spelt litt PS. Det har i grunnen vore deilig å sleppe å arbeide så hardt, men eg er glad for at eg var supereffektiv i går.

Golv og grunning

2012-01-07T00:47:00.003+01:00

Etter endt arbeidsdag fredag var eg eigentleg sliten. Middagen tok eg på café, og så drog eg på shopping på ein byggvarebutikk. Det vart eg i alle fall sliten av!

Etter ein kopp kaffi i heimen tok eg turen til nyehuset, der eg la ned nokre timars arbeid til. Resultatet var eit nytt golv på rommet til Minstemann og eit strøk grunning på badet nede. Innsatsviljen er større enn evnene, dessverre, og eg er framleis ein motorisk katastrofe. Resultatet skal nok bli bra, det har eg bestemt meg for på førehand.

Daglegvarer?

2012-01-05T20:15:00.002+01:00

I dag skulle eg handle. Ikkje på nokon måte noko merkeleg med det; det var nesten tomt for mjølk, heilt tomt for ost og eg planlegg søndagsmiddag.

I går kasta eg to av julestjernene mine fordi dei hadde døydd som indirekte følgje av orkanen (ikkje det at eg trur eg får att pengar på forsikringa eller noko, men som saksopplysning). Det vart derfor freistande å forsyne seg av dei grøne plantane som var på tilbod der eg vanlegvis handlar. Kven gidd å stikke innom ein dyr blomebutikk når ein får same plantane til halve prisen der ein likevel er innom?

Nokon hadde tipsa meg om å kjøpe såkalla "måleplast" på denne butikken, fordi det vert langt billegare enn å handle på ein byggvarehandel. Etter å ha leita ei stund, fann eg ein heil reol med verkty og utstyr for måling, beising og tapetsering. Prisane var svært låge, og kvaliteten sikkert deretter, men kor god kvalitet må det vere på målband, maskeringstape og white sprit? Eg handla inn ein heil del av det eg treng til vidare arbeid, og i morgon skal eg kjøpe det resterande i ein byggvarehandel. Då skal eg samanlikne prisar og godte meg over alt eg har spart.

Ein gong blogga eg om at eg ikkje fann fårikålkjøt, men derimot ei makuleringsmaskin i butikken. Eg lurer framleis på kva som vert rekna som "daglegvarer". Snøskufler? Elektriske varmeteppe?

Og kva vert konsekvensen av at daglegvarebutikkane tek føre seg av kundebehov som tidlegare vart stetta andre stader? Platebutikkar finst nesten ikkje lenger, fordi "alle" sel CD-ar. Vil det same skje med blomeforhandlarar, slik at vi kjøper ferdige gravferdskransar og brudebukettar på Rema 1000? Og kven skal gi meg gode råd om måling og tapetsering? Ekspeditrisa på Rimi?

Ideelt sett burde vi støtte opp om fagbransjane i mykje større grad, men som konsumentar vil vi leve og handle "kjapt, trygt og billig". Billege pølser og bensin døgeret rundt er viktigare for oss enn at ekspeditøren på Statoil kan hjelpe oss med å skifte ein sikring på bilen. Vi kjøper heller ein ny plante enn å lytte til gode råd om stell av den gamle. Og ikkje minst: vi er villege til å kjøre eit stykke for å handle ski, klede og andre "daglegvarer" på varehus utanfor sentrum.

For pengane vi sparer på "kupp" og "heilsprø tilbod" kjøper vi sjølvsagt meir. Sjølv sparte eg så mykje på handelen i dag at eg kunne ta meg råd til ekstra mykje julemarsipan til halv pris. Ein er trass alt ein medviten forbrukar.

Prosjekt "oppussing 2012" er i gang!

2012-01-04T19:04:00.003+01:00

I dag hadde eg planar om å skru ned nokre hyller og rive eit skap på det som skal bli rommet til Eldstejenta. Dette rommet skal anten målast eller tapetserast, alt ettersom. Å måle greier eg aleine, så eg skal prøve det først.

Etter å ha spurt Barnefaren om å få låne hammar og "skruegreier", tilbaud han seg å ta jobben. Eg nekta ikkje, men bad han om å ta bilete som dokumentasjon. Som takk fekk han pannekaker til middag - ein klar onsdagsfavoritt for ungane, men noko forseinka servert i dag på grunn av ein lang prosess med å få på plass ny oppvaskmaskin i heimen. Naboen tok den jobben, og no tek maskina oppvasken så eg kan konsentrere meg om noko eg kan...

Bok 1 2012: "Den lille prinsen" av Antoine de Saint-Exupéry

2012-01-03T23:46:00.001+01:00

Den franske piloten Saint-Exupéry skreiv denne barneboka i Amerika i 1942, etter å ha forlate heimlandet sitt på grunn av kapitulasjonen. Boka er verdskjend og mykje lese av born og vaksne, og no var det min vesle prins og min tur.

Handlinga er kort fortalt at ei barnsleg forteljarstemme fortel om eit møte med ein prins frå ein annan planet. I dette møtet kjem det opp tema om verdisyn og haldningar, noko ein kan oppsummere med at ein ser klart med hjartet det auget ikkje kan sjå.

Minstemann var djupt fascinert av boka, noko som overraska meg. Dei enkle illustrasjonane fall òg i smak. Ein skal ikkje undervurdere born sin evne til å filosofere.

Back to school

2012-01-03T22:51:00.000+01:00

Så var ferien brått over. Eg vakna ein halv time før vekkjarklokka begynte å pipe og var på plass på jobb nesten ein hav time før vi skulle starte. Eg likar ikkje å kome snikande inn når møta begynner, noko vi ferjefararar ofte gjer.

Dagen vart lang, med "verkstad" og gruppearbeid om høgtsvevande emne frå morgon til ettermiddag. Ein kan lure på kvar omgrepet "planleggingsdag" kjem frå, for planlegginga må skje etter arbeidstid. Nokre hadde seks undervisningstimar å planlegge til i morgon, berre for å ha nemnt eit problem som ikkje gjeld meg.

Etter jobb tok eg meg ein tur på TREN. Eg var spent på forma, men den var overraskande god etter ei jul med langt mindre fysisk fostring enn eg hadde sett føre meg. Å springe opp og ned trapper med ved og stearinlys er tydelegvis god trim. Ettermiddagen gjekk elles med til å hente ungane hos besteforeldra, handle, kjøre dei to mellomste til faren og deretter reise heim og lande i godstolen med ei god bok.

Sjølvsagt somna eg momentant. Etterpå åt eg store mengder snop for å få opp blodsukkeret.

Minstemann har kosa seg med PS medan mora sov og las. I morgon har vi heldigvis fri.

1. Nyttårsdag

2012-01-01T22:08:00.002+01:00

NB: eg legg ut dette innlegget utan bilete på grunn av datatrøbbel, men håpar på å få illustrert det seinare.

Jula 2011 kjem til å bli hugsa på grunn av orkanen Dagmar, og det er som nokon sa i dag nesten uverkeleg at vi hadde ei fin julekveldsfeiring før alt spetakkelet starta.

I dag har eg fotografert nokre av julegåvene mine - eg fekk mykje fint og nyttig, men vil berre vise fram nokre som kan ha "allmenn" interesse.

Systa har allereie blogga om sin "lestepuff" - den sølvfarga puffen min inneheldt mangt og mykje, mellom anna 12 par strikkalestar og eit tova vottepar. Eg vart mållaus av gåva, fekk hakeslepp og vart deretter utruleg glad. Dette nye møbelet skal brukast til oppbevaring av tjukkelestar, og den skal stå på ein sentral stad i heimen.

Noko anna eg fekk, var ei splitter ny vedkasse av metall. Den var både fin og praktisk - og akkurat det eg ønska meg (eg hadde tipsa givaren) Same givaren hadde dessutan fått eit utvitydig tips om eit heimesydd bilete med margerittar på som ein kollega av meg stilde ut på julemessa i bygda.

I Flora-serien fekk eg to nye sett (krus + fat) med eple og blåveis.

Noko anna eg hadde ønska meg, var kokeboka "Smalhans" av Gunda Djupvik. Eg kjem truleg attende til den om ikkje så lenge, for her er mange oppskrifter eg vil prøve ut.

Den siste gåva eg dreg fram her, er ein pakke som kom i posten på sjølvaste julaftan. Eg la den under treet utan å pakke den ut, sjølv om det ikkje eigentleg var ei juegåve. Det var nemleg dei fire skålene eg fekk då eg tinga eit halvt års abonnement på "Bonytt" for eit par månader sidan. Skålene er fine til å ete frukostblandingar i, og dei passar perfekt inn på mitt nye kjøken.

Apropos mitt nye kjøken, så har eg brukt noko av den første dagen i det nye året til å ta mål og prøve å planlegge oppussingsarbeidet framover. Det er ikkje mykje som skal gjerast, men noko er det. Og så skal eg kjøpe møblar, teppe, gardiner og anna som er litt meir overkomeleg enn grunning, sparkling, måling og spikring. Eg er ikkje akkurat nevenyttig - men eg kan kanskje bli?

Elles i dag har vi ete restar av middagen frå i går supplert med litt nytt, Eldstejenta og eg gjekk tur med hundane og vi har besøkt naboane. Ungane og eg har fri i morgon òg, men så er det slutt på denne svært spesielle ferien...

Tider skal komme

2012-01-01T01:48:00.001+01:00

Nyttår er ofte ei tid for ettertanke. Etter nokre slike kveldar i eit liv, er det lett å tenkje attende på tider som har "henrulla". Mange gonger har ein stått og sett på fyrverkeriet saman med familie og vener og drøymt draumar om framtida, men det har òg vore vonde tider då orda "godt nytt år" har vore vanskeleg å ta til seg.

Den store snakkisen på årets nyttårsfeiring var sjølvsagt orkan og mangel på straum, noko som har sett sitt preg på den vesle bygda. Mange har opplevd dette som den verste jula nokosinne, med mas og kaos i staden for mat og kos.

Eg har mange planar og håp for det nye året, noko som kjem til å syne att på bloggen utover vinteren. Vi skal nemleg til å skape oss ein ny heim, med alt det inneber av oppussing og møblering. Interessa mi for interiør har vore svært laber dei siste åra, men kan no ta heilt overhand.

Noko anna som skal skje i 2012, er at Storegut skal døypast og konfirmerast, delta på UKM med bandet og reise på aktiv fredsreise saman med klassa (og faren). Eldstejenta skal vere russ i vår, og så må ho velje veg vidare i livet. Det er store milepælar i liva deira, og ein kan berre håpe på at det blir positive minne for livet.

Alt ein kan gjere når det gjeld framtida, er å håpe på det beste. 2011 vart eit dramatisk år på utruleg mange måtar, og sånn sett er det godt å legge det bak seg. Dei gode minna frå året har på ein måte drukna i alt det vonde, med 22. juli som den absolutt verste dagen for oss her i landet. Utover våren vil det bli mykje fokus på mannen bak ugjerningane, og ein får berre håpe at dette ikkje blir ei samanhengande vond tid for dei pårørande, men at dei får kvardagen sin attende.

For det er i kvardagen vi trivst best - det ser vi når den daglege donten vert teken frå oss og vi saknar den meir enn vi trudde var mogleg.

Godt nytt år!

Nyttårsaftan 2011

2011-12-31T19:38:00.000+01:00

Dei tre yngste og eg gjekk ein lang tur med hundane i skogsvegen medan det var dagslys. Eit tynt lag nysnø gjorde verda mykje lysare enn den har vore siste dagane, og hundane set stor pris på litt snø å rulle seg i.

Barnefaren tok seg av det meste av matlaginga, det vil seie alt utanom sausen. På menyen stod kalkun med fløtegratinerte poteter, sopp, rosenkål, blomkål, brokkoli, druer, tyttebærsylte og min sjølvkomponerte (og gode) saus, som mellom anna inneheldt balsamicoeddik og karamellsaus.

Etter middag har dei to yngste gjort seg klare til å gå nyttårsbukk.

Eg vil med dette ønskje alle blogglesarar ei triveleg nyttårsfeiring!

Bok 90 2011: "Kvinnen som kledte seg naken for sin elskede" av Jan Wiese

2011-12-30T23:19:00.001+01:00

Årets siste fullførte leseprosjekt var denne vesle boka av Jan Wiese. Den kom først ut i 1990, og etter mi meining har den noko typisk 90-tals over seg. Fleire historier vert fletta saman, mykje fordi ein i rammeforteljinga møter ein bibliotekar som les gamle skrifter frå Vatikanet, og fordi desse skriftene vert vevde inn i kvarandre. Det er til dels svært gripande historier, og dei minner meg både om asiatisk og latin-amerikansk litteratur eg har lese tidlegare.

Eg likte boka godt, men vart freista til å lese den ein gong til. Det plar vere eit kvalitetsteikn, men det kan òg bety at eg trur eg har gått glipp av noko undervegs.

6. juledag: feriekjensle

2011-12-30T22:19:00.001+01:00

I dag rusla ungane og eg ein tur og såg på fleire spor etter orkanen Dagmar. Ho har verkeleg feia med seg mykje og sørga for utsikt mot havet der det før var tett granskog.

Resten av dagen har vi sløsa med vatn og straum etter beste evne - ungane har kosa seg med data og PS medan Gamla har lese bok. Det var slik store delar av romjula skulle bli, men no fekk vi i alle fall EIN roleg dag. Ikkje alle har vore så heldige.

Bok 89 2011: "Alene mot ondskapen" av Jack Cavanaugh

2011-12-30T21:34:00.001+01:00

Eg lånte ein trilogi på biblioteket før jul - mest fordi eg såg hakekorset på omslaget. Ei skumlesing av vaskelappen sa meg at det heile handla om tysk motstand mot nazismen, og det høyrdest interessant ut.

Opplesaren brukte ei æve på å fortelje om boka og forlaget, mykje fordi han las ufatteleg sakte. At lydbokforlaget "KABB" stod for "Kristent Arbeid Blant Blinde og svaksynte" gjorde meg etter kvart rimeleg skeptisk. Opplesaren las ikkje berre sakte, men med ein pussig setningsmelodi som verka forstyrrande på lesinga.

Ein ven seg til det meste, og etter ei stund irriterte eg meg mindre og konsentrerte meg meir om sjølve boka. Det er ei spennande, litt sentimental historie om ein prest som vil arbeide mot grusomheitene til nazistane, og som dermed set sitt eige og andre sine liv i stor fare.

Boka har noko stereotypiske karakterar og klisjéfylt handling, men det er ikkje så gale som eg først frykta. Kristen litteratur er ikkje ein sjanger eg kjenner til anna enn frå barndomen, og eg har truleg fleire fordomar enn naudsynt.

5. juledag: mykje lys, noko varme - og meir oppvask

2011-12-29T23:50:00.003+01:00

Dei to små og eg gjekk ein runde på garden og fotograferte før vi tok med oss hundane i skogsvegen. Der var ein del knekte tre, men ikkje så ille som mange andre stader.

Vi fekk endeleg gladmeldinga om at straumen var komen att i heimen vår, og vi reiste heim med godt mot. Varmepumpa hadde slått seg av fordi ein sikring var gåen, men ein panelomn i stova varma litt. Vaskemaskina og komfyren kom fort i bruk, men så viste det seg at også i dette huset var oppvaskmaskina gåen. Og her var lite varmevat, så eg måtte til å koke vatn både til vask og skylling. Oppvaskmaskina hadde vore under oppfylling i ei veke, så det vart ein del å vaske. Så heldt eg varmen på hendene medan huset vart gradvis varmare.

Eg sette meg til med facebook og denslags etter oppvasken, men brått vart datamaskina mørklagd. No sit eg her og skriv på maskina til ungane, og så håpar eg på å få fiksa minst ei av maskinene i morgon. Eg trur eg heller vil vaske opp for hand enn å vere utan dataen min, men det er neppe opp til meg å velje.

4. juledag: Klimaflyktningar på turné

2011-12-29T23:42:00.000+01:00

Då vi vakna i Volda, kjende eg at eg ikkje var heilt klar for å reise heim til eit mørkt og kaldt hus. Vi fekk frukost og dusja dessutan etter tur før vi tok oss ein tur til Ørsta, der vi fekk middag. Då eg kjørte Eldstejenta heim ut på sein ettermiddag, fekk eg telefon om at straumen no var komen att, deretter kom ei ny melding om at dei fleste på hi sida hadde fått att straumen, men ikkje vi. Då var vi allereie på veg over fjorden.

Barnefaren hadde fått att straumen, så vi for dit. Der var tv-signal og telefon-samband, men ikkje internett. Oppvaskmaskina hadde dessutan takka for seg, så då fekk eg gjort noko nytte for meg i tillegg til å stormfyre i begge omnane.

3. juledag: Broadline på Rokken

2011-12-29T23:35:00.001+01:00

Nok ein mørklagd morgon, og temperaturen på stova var no nede i 7 grader!

Vi pakka det mest nødvendige og rømde til Volda, der besteforeldra skulle passe dei tre yngste medan Barnefaren, eg og Eldstejenta var på Rokken.

Broadline var det første bandet Barnefaren spelte i, tidleg på 80-talet, og denne kvelden var det duka for deira tredje store reunionskonsert. Billettane har vore utselde lenge, så dette er populært - spesielt blant oss som hugsar 80-talet.

Det vart ein kjekk kveld, og mange blant artistar og i publikum hadde stort behov for å tenkje på noko anna ein kveld, i staden for å gremme seg over mangel på både det eine og det andre.

2. juledag: familietreff i Ørsta

2011-12-29T23:28:00.001+01:00

Det er ein tradisjon i familien å samlast hos besteforeldra i Ørsta 2. juledag. Vi vakna i eit mørkt og kaldt hus, og skunda oss av garde til hybelen til Eldstejenta, der vi dusja og kledde oss før turen gjekk vidare.

I Ørsta hadde vi ein triveleg dag saman med slekta, og det store samtaleemnet var sjølvsagt vêret. Då vi kjende det begynte å blåse opp att, vart vi noko rastlause og reiste heim. Der var straumen framleis borte, og det var 10 grader i stova. Vedomnen på loftstova virkar fint, så vi la oss der alle saman, i seng, på sofaer og madrassar på golvet. Temperaturen kom på kokepunktet, og vi fall i koma og sov godt alle saman.

1. juledag: stormen Dagmar

2011-12-29T23:07:00.002+01:00

Sidan det var meldt storm om kvelden, gjekk vi oss ein lang tur med hundane i skogsvegen medan det var nokolunde lyst. Til middag hadde vi restar frå julaftan, slik vi plar. Ungane og eg sanka saman tinga våre og sette av garde heimover, og vi kom akkurat i hus tidsnok til å få oppleve at straumen gjekk. Med elektrisk vasspumpe forsvann også alt vatn, både varmt og kaldt.

Ungane tok det heile sporty og kosa seg med lego (Minstemann) og spel. Vi fekk testa ut nokre brettspel, lese nokre julehefte og hatt allsang med kassegitar innan det var på tide å legge seg. Stormen herja fælt ute, og det var bekmørkt, så vi fann ut at det beste var om dei to eldste låg i senga mi medan dei to små låg på flatseng i stova der Gamla heldt stearinlysvakt i godstolen. Det vart ikkje mykje søvn, men heller ikkje mange øydeleggingar her hos oss. Pipehatten fauk av og landa like ved bilen, men traff den ikkje. Då vi neste dag såg korleis det såg ut andre stader i nærmiljøet, skjøna vi at vi var heldige, trass alt.

Årets julefilm

2011-12-25T14:15:00.000+01:00

Julaftan 2011

2011-12-25T01:02:00.000+01:00

Vi har feira ei tradisjonell jul med julefrokost, gudsteneste, pinnekjøt, nisse og pakkar. Alt har vore vellukka og utan stress, og vi har i år vore ekstra glade for å vere samla rundt bordet alle saman. Ikkje alle er like heldige, anten dei har familie som må arbeide, har valt å feire jul ein annan stad eller har falle frå.

På frokostbordet hadde vi mellom anna varm sjokolade med marshmallows, spekemat, røykelaks, eggerøre, syltaflesk, tomatsild og sursild.

24. desember: julefilm (gåve frå dei tre eldste)

2011-12-24T23:37:00.000+01:00

23. desember: vesle julaftan

2011-12-23T20:15:00.000+01:00

I familien vår har vi tradisjon for å ete graut med mandel til middag vesle julaftan. Deretter pyntar vi juletreet - i år var det ikkje eit tre henta frå eigen skog, men ei edelgran kjøpt i butikk. Ungane måtte bort for å knipe på det og forsikre seg om at det ikkje var laga av plast.

Eldstejenta fekk mandelen i år, og premien var ein stor mjølkesjokolade som ho måtte dele med oss andre. Straffa var å måtte ete mandelen...

God jul til alle blogglesarar der ute!

Bok 88 2011: "Vann til elefantene" av Sara Gruen

2011-12-23T19:56:00.000+01:00

Dette er ein artig roman, fylt av romantikk og spenning. Ein mann på 90 eller 93 (han er ikkje heilt sikker) ser attende på ein periode i livet då han som ung veterinærstudent vert med eit omreisande sirkus. Vi får eit innblikk i denne eksotiske verda, der intrigar og dramatikk står sentralt. Forfattaren har lese seg opp på historia til togsirkusa i USA på 1920- og 30-talet, og mykje av dramatikken i romanen er basert på verkelege hendingar. Boka er underhaldande lesing, og eg ser no fram til å få sjå filmatiseringa.

22.desember: siste innspurt

2011-12-23T00:13:00.000+01:00

I dag hadde eg eit par julegåver att som skulle kjøpast. Dessutan skulle eg handle litt mat og diverse, sjå litt i interiørbutikkar og andre koselege ærend. Det enda som vanleg opp med at eg fekk meg middag, denne gongen i Starevegen.

I dag er det 18 år sidan vi flytta inn i nytt hus i Ulsteinvik med Eldstejenta som 9 mnd gamal baby. Det er litt rart og vemodig, for mykje har skjedd sidan den gong både av godt og gale. Uansett er eg glad for at eg ikkje har stresset med å flytte akkurat no, for desse bonusdagane før jul er nødvendige for å roe ned til høgtida.

I morgon begynner det tradisjonelle juleopplegget i familien, og vi kan senke skuldrane når det gjeld aktivitetar og innkjøp.

21. desember: øy(s)hopping

2011-12-22T00:50:00.000+01:00

Første juleferiedag, og eg tok turen under sjøen til Ulsteinvik for å handle hemmelege greier til store og små. Sidan eg var på øya, vart det ein tur til Hareid for å sjekke ut julebaksten og bytte presangar. Personleg blir eg meir sliten av nokre timar på shopping enn av til dømes ein fjelltur, og eg vart nesten skuffa då eg såg at skritt-teljaren hadde stoppa på 6500...

20. desember: siste skuledag før jul

2011-12-20T18:53:00.000+01:00

Elevar og lærarar møtte til første time i dag - mange av russane framleis iført juleballantrekk (for å få eitt eller anna i luene i mai). Første timen var vi samla klassevis på våre respektive klasserom, deretter tok vi turen ned i gymhallen, der rektor talte og vi gjekk rundt eit mikroskopisk juletre. Vidare gjekk turen i kyrkja, der det var julegudsteneste og songinnslag ved musikklinja. Eg kjørte nokre frostige russejenter heim for å sove, deretter for eg på jobb att, for å feire juleferien saman med kollegaer.

Som om ikkje dette var nok, gjekk eg på café saman med nokre kollegaer etter arbeidstid.

Vel heime har eg gått ein lang tur på glatta, og no kosar eg meg med diverse inneaktivitetar som kan kombinerast med å lytte til lydbok.

Ei varm helsing til alle som får velfortent ferie no!

Bok 87 2011: "Den glemte hagen" av Kate Morton

2011-12-19T23:38:00.000+01:00

Det har teke si tid å høyre gjennom alle dei 17 cd-ane, men lesinga har vore ei rein fryd. Vi fyl tre parallelle historier frå fortid og notid, og det heile utviklar seg til litt av eit drama. Eg vil ikkje røpe noko av handlinga, men berre anbefale boka på det sterkaste for dei som likar mysterium. Eg likte godt "Tilbake til Riverton" av same forfattar, men lurer på om eg ikkje likar denne litt betre. Den minner om både "Den løyndomsfulle hagen" og "Lille lord Fountleroy", men historia er sjølvsagt tilpassa vaksne og stilen ein smule meir realistisk.

19. desember: Vardefest

2011-12-19T23:21:00.000+01:00

Så gjekk årets juleball av stabelen, og i år var Eldstejenta russ med ballkjole og tøfler. Ho deltok dessutan i programmet saman med andre danseglade russejenter (dei får noko i russelua for å delta i programmet) og vart kåra til "Årets danseløve". Gamla måtte ein snartur på dansegolvet ho òg, for å sikre noko anna i lua til dottera.

18. desember: Let it snow...

2011-12-18T18:08:00.001+01:00

Fjerde søndag i advent vart nok ein roleg heimedag med tur ut på slapsete vegar og tradisjonell familiemiddag. Vi har tent det fjerde lyset og roa ned før den siste innspurten til jul.

17. desember: Winter Wonderland

2011-12-17T17:38:00.001+01:00

Etter ein lang og sein frokost tok eg med dei tre yngste og hundane på ein tur i skogsvegen. Det var berre vanleg overskya då vi begynte å gå, men medan vi var i skogen begynte det å snø ganske kraftig. Å vere i granskog medan det snør kan gi fin julestemning, men snøen var så våt at vi vart meir opptekne av å kome oss heim og tørke enn av å kose oss med julestemning. Noko tid vart det uansett til gøyme-og-leite med hundane i "Trollskogen" og ein aldri så liten snøballkrig.

Resten av ettermiddagen har vi brukt til hus- og klesvask, rydding og anna husarbeid. Eg har heldigvis nokre feriedagar før julaftan, så det er ikkje så mykje stress med julegåveshopping før ut i veka. Vi høyrer julemusikk og tek livet ganske roleg - enn så lenge.

16. desember: Snødronninga

2011-12-16T21:48:00.000+01:00

Etter ein relativt lang jobbdag, ein roleg cafédate og middag i Ørsta tok eg med jentene på ballettframsyninga "Snødronninga" på Ørsta kulturhus. Litt uvant å gå på ei danseframsyning utan å sitje og speide etter ungane sine, men absolutt ei flott framsyning med mykje vakker dans, lyssetjing og kostyme. Veslejenta dansar ikkje klassisk i år, men ho vurderer sterkt å begynne på att til hausten. Det støttar eg - det er nydeleg å sjå på, sjølv om jazz er artigare og har meir fengande musikk.

Meir informasjon om framsyninga finn du her

15. desember: Lommerosk på juleball

2011-12-15T22:44:00.001+01:00

Medan småungane og eg har hatt ein roleg kveld i heimen, er Storegut på juleball i Volda. Bandet han spelar/syng i er ein del av underhaldninga på festen, og er spent på å høyre korleis mottakinga har vore. I natt skal han overnatte i leilegheita til Eldstejenta.

Barnefaren møtte opp på lydsjekk - han har eit par band på gang sjølv, og synest det er stas at poden går i hans (og farens) opptrakka spor.

Video her

14. desember: storhandel med småungane

2011-12-14T21:23:00.000+01:00

Minstemann hadde tannlegetime på denne vekas fri-onsdag, og då høvde det godt å få unna litt julehandel saman med dei to yngste. Vanlegvis er eg glad for at ungane mine har vener, men akkurat det med venegåver til jul har eg lett for å gløyme/fortrenge. Vi enda opp med mellom ti og femten gåver, og i kveldinga har Veslejenta pakka inn alt saman. Ho er mykje flinkare enn meg til å pakke inn fint, og ho har full kontroll på kva som skal stå på lappane.

Storegut har kvilt på sine laurbær i kveld, i og med at han skal opptre på juleball i morgon.

Minstemann og eg har berre kvilt. Det er fantastisk å vere ferdig med julerettinga, og eg kan eigentleg seie eg er ferdig med julebaksten òg, i og med at eg ikkje har tenkt å bake ei einaste småkake i år. Vi har handla ferdig klede til jul, og berre nokre få gåver står att. Eg ser fram til nokre rolege dagar i neste veke!

13. desember: julefest på Folkestad skule

2011-12-13T22:41:00.000+01:00

Ein av dei mange fordelane med å bu i ei lita bygd, er at skulen her er tilsvarande oversiktleg. Dei fleste elevane går på same skulen i ti år, men nokre frå Bjørkedalen går på friskulen der nokre år først. Vi har i fleire år hatt tre ungar på skulen; Eldstejenta gjekk ut av tiande våren før Minstemann begynte i første klasse. Ho ville gjerne kome for å delta på festen og møte gamle kjende, og kanskje aller mest for å sjå søskena opptre.

Festen opna på tradisjonelt vis med at første og andre klasse kom syngande inn i Lucia-tog. Deretter song dei ein song til, om alfabetet. Tredje klasse, der Minstemann går, song saman med fjerde klasse "Stopp, ikkje mobb" og "Himmel på jord". Femte og sjette klasse, der Veslejenta går, song "Forelska i lærer'n". deretter framførte jentene ein eigenkoreografert dans. To jenter frå tiande klasse dansa òg, etterfølgt av diktlesing frå sjuande klasse. Deretter spelte "Lommerosk" to eigenkomponerte songar. Åttande klasse song "Home for Christmas", og niande song "Stjernesludd" med Storegut som solist. Til slutt song og mima tiande klasse til "Johnny be Good" og "I was made for loving you".

Etter programmet vart det buffet med "mat på fat".

Ein triveleg førejulskveld med flinke elevar og lærarar! 

12. desember: the nightmare before Christmas is finally over!

2011-12-12T21:42:00.000+01:00

I dag hadde eg ein relativt sløv dag på jobb når det gjaldt undervisning, men ein nyttig gjennomgang av oppgåvene i den siste bunken min. Eg begynte på den langtekkelege jobben med å lese gjennom alle svara ein gong til, skrive kommentarar og setje karakterar - noko som eg har fullført no i kveldinga.

Etter jobb brukte vi ein time til å handle inn besteklede til gutane, i tillegg til eit par julegåver.

Mitt største førejulsstress er å rette tentamensbunkar, og når det no er overstått ser eg fram til å kunne bruke dei resterande dagane til andre aktivitetar!

11. desember: tredje søndag i advent

2011-12-11T18:48:00.000+01:00

Barnefaren skulle vere vakt på Reset i dag, og dei to små vart med dit. Storegut skulle på fotballtrening, av alle ting, og Eldstejenta tok seg ein shoppingtur til Moa. Sjølv sat eg det meste av dagen og retta tentamenssvar - no har eg ikkje meir enn kommentarskrivinga att, så er eg i mål før jul! Ein tur etter vegane vart det både tid til, og behov for. Det beste med fridagar denne årstida er å få vere litt ute i dagslys.

Då gjengen var på retur frå skibakken, sende dei ei melding om at eg kunne setje på potetene. Eg laga klar middagen, som var ovnssteikt aure/ørret med crème fraîche, mandelpoteter og grønsaker. På potetene hadde vi litt ekstra meierismør - "krisa" i landet gjer at ein får litt ekstra lyst på smør. Til dessert blei det fruktsalat og krem, etter ønske frå Veslejenta.

10. desember: juleverkstad i Kilsfjord kyrkje

2011-12-10T20:29:00.000+01:00

Ein hyggeleg tradisjon i bygda er å samlast til juleverkstad i kyrkja ei laurdag i adventstida. Ungane fekk lage mykje fint, og på kjøkenet vart det baka verdas beste lussekattar til glede for born og foreldre. Ikkje alle i barneflokken min er like ivrige etter å drive på med formingsaktivitetar, men det er ikkje produkta som tel. Reint bortsett frå at eg fekk eit nytt sortiment med kjøleskåpsmagnetar; akkurat det eg ønska meg.

9. desember: meir om bunkar og pakkar, faktisk, og litt om film

2011-12-09T21:26:00.002+01:00

På jobb i dag fekk eg delt ut bunke nummer 2 i advent, og eg sit no att med kun EIN tentamensbunke. Elles vart det litt film, litt fredagssong, litt julesong og ein vikartime på tampen.

Av jobbrelaterte juleførebuingar går det mykje i gjenbruk, men i dag viste eg for første gong bonusmateriellet som ligg ved filmen "A Christmas Carol". Det er utruleg interessant å sjå korleis filmen er laga, etter å ha sett den ferdige filmen først. I neste veke skal eg sjå den eit par, tre gonger - litt av eit strev å vere engelsklærar!

Etter jobb var eg først på den etter kvart så innarbeidde tradisjonen med fredagscafé, og så for Eldstejenta og eg på ein effektiv shoppingrunde med påfølgjande middagsinvitasjon hos foreldra mine. På menyen stod svineribbe, noko som førte til lite mathandel etterpå.

8. desember: om bunkar og pakkar

2011-12-08T21:52:00.000+01:00

I dag oppdaga eg at den første tentamensbunken, som eg fekk retta ferdig i går kveld, lukta røykelse. Det seier sitt om julestemninga her i heimen.

Planen i dag var eigentleg å fare på shopping og TRENing, men eg droppa det og gjekk meg i staden ein tur ut etter at eg hadde kome heim. Ein må nytte (og nyte) dei fine kveldane ein får på denne årstida, og i dag var det om lag null grader og vindstille ute.

Vel heime att kom eg meg nesten til botnen av bunke nummer to i advent. Dessutan fekk eg pakka inn nokre gåver eg har kjøpt innimellom slaga. Det er hardt med kveldsarbeid etter ein normal arbeidsdag, men innspurten no kan føre til ein velfortent juleferie utan retting.

Bok 86 2011: "Hjerterått" av Chelsea Cain

2011-12-08T17:48:00.000+01:00

Tredje boka i serien om Beauty Killer Gretchen Lowell er meir makaber enn spennande. Det har oppstått ein heil kult omkring massemordaren, og lik vert funne på tidlegare åstadar for mord i hennar "karriere". Archie og Susan er attende i kjend stil, og boka er ganske underhaldande. I ei bokmelding på Aschehoug skriv dei at boka saman med den fjerde i serien "bekrefter Cain sin evne til å skrive besettende historier og holde leseren i åndeløs spenning". Eg er ikkje fullt så begeistra, og eg har pusta roleg gjennom heile lesinga.

7. desember: White Christmas?

2011-12-07T23:13:00.000+01:00

Eg treng ikkje snø julaftan. Då er programmet så spikra at vêret er heilt sekundært, og moking nærast uaktuelt. No i mørkaste tida er snømoking før ein fær på jobb lite attraktivt, så eg er nøgd når det er mildt ute. Men når ein har ein fridag som i dag, og Minstemann skulle på besøk til ein kompis, var det flott å gå seg ein tur med utsikt over snødekte fjell.

Dagen elles har gått med til å fullføre vurderinga av første bunke i advent - det er eg svært nøgd med.

6. desember: det er tid for tysdagskos

2011-12-06T20:05:00.001+01:00

Etter jobb i dag rakk eg å TRENe, handle og stikke innom biblioteket før eg tok ferja over fjorden for å hente Minstemann på SFO. Deretter hadde vi eit ærend inne i bygda, i høve kulden, og då fekk vi like godt servert ferdig middag av Barnefaren. Etter ein episode med "Jul i Blåfjell" pitla vi oss heim att, og no kosar vi oss med tv "med nogo attåt". Eg ser fram til ein rettefri kveld, etter to hektiske kveldar med første bunke i advent.

5. desember: Love Thy Neighbour

2011-12-05T19:02:00.000+01:00

Dagen min begynte då eg i gryotta vakna av at store mengder snø rasa av taket. Eg frykta at eg måtte ut og moke litt seinare i otta, men det kom regn ned i snøen og forvandla den til seigt slaps. Det gjekk fint å kome seg ned på vegen, men i løpet av jobbdagen høyrde eg fleire historier om folk som hadde hatt problem i lokaltrafikken, og at det snart vil fryse på. Eg gjekk såleis ut frå at det vart skraping av tun som ettermiddagsaktivitet.

Vel heime vart eg møtt av synet av eit nyfresa tun. Naboen min har snøfresar, og han synest det går for det same å svippe seg bort vegen "min" òg.

Slik gjekk det til at eg fekk vie meg til rettingsarbeidet i kveld òg, i tillegg til at eg gjekk meg ein tur i hagl og vind. Eg er uendeleg takksam for det.

4. desember: 2. søndag i advent

2011-12-04T18:20:00.001+01:00

Dei to små og eg gjekk oss ein tur ut i vind og hagl før middag. Til middag serverte eg medisterkaker (eller "meslingkaker", som Minstemann kalla det).

I kveldinga skal Storegut på lysmesse i kyrkja, men eg sit heime med ein tentamensbunke. Det er òg ein førejulstradisjon.

3. desember: ballettshow

2011-12-03T19:37:00.002+01:00

I dag var det tid for den årlege vintermatinéen til ballettskulen. Begge jentene deltok i den første delen av programmet, som var eit contemporarystykke med tittelen "Evolution". Veslejenta var luft, medan Eldstejenta var eld. Alle elementa gjorde ein flott innsats. Stykket har vore synt for nokre år sidan, men der var gjort ein del endringar. Etter ein pause dansa tre jenter saman i ein eigen moderne dans, og så kom ein sekvens med jazzdans. Vi såg berre den første framsyninga, og då var det dei yngste dansarane som kom på scenen. Veslejenta deltok blant ein del andre, utkledd som leopard.

Etter showet vart det handla inn til resten av helga, og så fekk vi middag hos Mormor og Morfar før vi for heim og tok kveld.

Biletserie frå Sunnmørsposten finn du her

2. desember: juledisco

2011-12-02T20:59:00.000+01:00

Etter ein aktiv dag på jobb var eg eigentleg klar for ein roleg kveld i heimen. Ungane, derimot, har fullt program for heile helga, og Gamla stiller sjølvsagt som Taxi-sjåfør. Storegut for på bandøving og overnattingsbesøk etter skulen, og Veslejenta er på disco. Minstemann regjerer på loftet, medan eg bruker kvelden til rydding og tv-sjåing.

Eg fekk inn ein bunke i dag, men den ligg førebels trygt i sekken.

Bok 85 2011: "Kadaverdokteren" av Lene Kaaberbøl

2011-12-02T18:53:00.001+01:00

Etter å ha lytta til denne boka med stor interesse og entusiasme, skjøna eg ikkje slutten. Då eg begynte å lese om boka, skjøna eg kvifor. Boka er nemleg første del i ein trilogi, og det visste eg ikkje. Noko irriterande, men til å leve med.

Boka handlar om mystiske mord, sjukdomar og forsvinningar, og handlinga er lagd til slutten av 1800-talet. Eg vart riven med, men fryktar at dette kjem til å bli for mykje fantasy-prega etter min smak. Eg likar verken Twilight eller Åndenes Makt, men kan sette pris på ei god spøkelseshistorie eller Draculaforteljing innimellom.

1. desember: "Nightmare Before Christmas"

2011-12-02T09:14:00.000+01:00

Første desember brakar det laust med kalendergåver, juleprogram og alt som høyrer til. I år har eg registrert at det er blitt vanleg at mødrer sender pakkekalender til sine vaksne born (i alle fall døtrer), og at gutar gir kalender til dama si.

Mine søte små har fått kvar sin skrapekalender, bortsett frå Minstemann, som fekk kalender frå Lego City. Kanskje er dette eit teikn på at eg er ei dårleg mor - uansett er eg ikkje med på all den hysteriske kosen, og eg tek ikkje mål av meg til å bli superhusmor som "må" gjere alt sjølv, fordi det elles ikkje blir ei "skikkeleg jul".

Vi opna desember med vår eiga form for kos; vi såg filmen "A Nightmare Before Christmas". Ute storma og regna det, men vi sat inne, hadde det godt og varmt og kosa oss (utan snop eller snacks, faktisk, og i alle fall utan julekaker). Minstemann krølla seg saman på fanget mitt, og vi var alle samla i same rom. Slike stunder er meir verdt for meg enn sju sortar, heimelaga syltaflesk og lefser.

Frionsdag med kompisbesøk

2011-11-30T19:02:00.000+01:00

Siste dagen i november vart både mørk og regnfylt. Då passa det bra å hente ein kompis av Minstemann. Eg hadde spurt ungane på førehand om vi skulle bake julekaker, til dømes serinakaker, men dei ville heller ha mini-sveler. Det skal seiast at gutane hadde baka peparkaker på SFO i går, så dei får delta i juleførebuingar andre stader enn heime hos meg.

Dagen gjekk med til prøveretting og husarbeid for min del, medan ungane kosa seg og leika på eiga hand. Vi var ein snartur ut for å feste lys i eit tre, men elles vart det inneliv. Då kompisen reiste, gjekk eg meg ein tur ut aleine i regn og vind.

Bok 84 2011: "Hello Mum" av Bernadine Evaristo

2011-11-29T23:46:00.000+01:00

Denne boka vart presentert på det engelskkurset eg var på for eit par veker sidan, og den er ei av bøkene i serien "Quick Reads" frå forlaget Penguin.

Boka er eit brev frå ein fjorten år gamal gut til mora hans. Dei bur i ein del av London som ikkje høyrer til dei mest kjende turistmåla, og der veks Jerome opp frå å vere den flinkaste guten i klassa til å bli ein narkodealande gangster. Det er verkeleg eit hardt miljø, der det gjeld å ha dei rette kleda, den rette gangarten og for all del ikkje bevege seg utanom sitt heime-territorium.

Boka er kort, berre om lag 80 sider, og vi vurderer å kjøpe inn eit klassesett til skulebruk. Boka er nemleg påde lærerik og gripande.

Bok 83 2011: "1Q84 Bok 2" av Haruki Murakami

2011-11-28T19:34:00.000+01:00

Det er ikkje så veldig lurt å bli hekta på ein trilogi, når den tredje boka ikkje ligg føre på norsk før om eit par månader. Bøkene er svært spesielle og spennande, spesielt fordi dei to historiene kan kome til å krysse kvarandre i tredje bok. Kanskje får vi forklaring på kva det parallelle universet er.

Personane i romanane er lette å feste seg ved og kjenne sympati for, og undervegs får vi ta del i tankevekkjande episodar som desse personane er utsette for. Eg er svært begeistra, og ventar altså i spenning på den siste boka i serien.

1. søndag i advent, andre akt

2011-11-27T20:52:00.000+01:00

Med to heimar blir det sjølvsagt også to adventstakar. Heime hos oss var det Veslejenta som tende det første lyset. I år droppa eg lilla adventspynt og gjekk rett på raudfargen, så då vart det kvite lys i adventsstaken òg. Elles bruker eg store mengde kongerøykelse for å få den rette lukta i huset, og eg har handla inn nye jule-cd'ar og julefilmar. Vi skal no vite å kose oss, sjølv om vi ikkje et så mange kaker!

Årets julebakst 2011?

2011-11-27T20:47:00.000+01:00

Førejulstida er for meg synonymt med tentamensretting, ballett, gåvehandling og avslutningsfestar. Kakebakst er ikkje noko eg stressar med; ingen i familien er særleg begeistra for kaker, og vi synest ferdigkjøpte peparkaker er minst like gode som heimelaga. Viss eg plutseleg finn ut eg skal bake nokre sortar, er det fordi eg har lyst, ikkje fordi eg synest det må til. To sortar + karameller er i boks etter ein liten handel med Storegut.

Juleballj

2011-11-27T20:29:00.000+01:00

Heile familien var samla til juleballj i dag - dvs raspeballar med pinnekjøt til. Det smakte fortreffelig, og eg var glad eg hadde trimma frå meg tidlegare på dag. Eldstejenta tende første lys i advent.

1. søndag i advent: salsmesse på Straumshamn

2011-11-27T20:25:00.000+01:00

Primus motor bak prosjektet, min tidlegare nabo K, hadde i utgangspunktet håpa på å få 10 utstillarar til denne salsmessa., men talet vart fort det doble. Av varer ein kunne kjøpe var mykje fint handarbeid, smykke, mat og måleri. Storegut og klassen stilte med varer som dei sel til inntekt for Polenturen dei skal på neste haust.

Mange møtte opp for å sjå og handle, eller for å ta ein kopp kaffi og eit kakestykke i kaféen. Arrangementet var ein stor suksess blant store og små, så dette blir truleg eit arrangement neste år også.

Sjølv enda eg berre opp med å kjøpe kaffi og kake, men der var mykje eg ønska meg...

Gratulerer med 71-årsdagen, Farfar

2011-11-25T19:15:00.000+01:00

Minstemann 8 år!

2011-11-24T21:30:00.000+01:00

Blåveisguten har fått pakkar ("akkurat det ej ønska mej"), og vi har ete middag på kinarestaurant og sett "Jul i Blåfjell 2" i 3D på kino. Heile familien var samla på kino, og det var veldig koseleg. Kameraet mitt var sjølvsagt tomt for batteri i høve dagen, så eg legg inn eit bilete frå Barnefarens mobil. Det etter kvart så berømte auget er no både blått, gult og lilla, men han er like blid.

Bok 82 2011: "1Q84 bok 1" av Haruki Murakami

2011-11-22T20:28:00.000+01:00

Dette er første bok i ein serie på tre, og berre dei to første ligg føre på norsk så langt. Eg kjem truleg til å skrive fyldigare om bøkene når eg har lese alle, men kan så langt nemne at denne første boka handlar om alt frå sex til sekter, og den kan både kallast realisme og fantasy. Det er først og fremst persongalleriet som fascinerer meg, og eg er nysgjerrig på kva som skjer vidare, og om dei parallelle forteljingane kjem til å krysse kvarandre.

Bedre og bedre dag for dag

2011-11-22T17:41:00.001+01:00

Minstemanns kul blir stadig mindre, men skiftar fargar frå blå til lilla. Som den Myrsnipemammaen eg er, synest eg sjølvsagt han er minst like skjønn som vanleg. Då han sjølv fekk sjå dette biletet, utbraut han: "Ej ser ut som om ej skal i militæret. Eller som om ej he vore der ei stund."

Where have you been, my blue-eyed son?

2011-11-21T19:04:00.000+01:00

Det er dagen derpå. Minstemanns auge har vore utsett for ein del kommentarar og blikk siste døgeret, men han tek det heile med stoisk ro. Han påstår han kan sjå like godt som elles, så det er ingen fare for at han ikkje skal kunne spele PS eller gå på kino dei komande dagane.

Kul bursdagsfeiring

2011-11-20T20:35:00.001+01:00

Minstemann feira bursdagen sin i dag saman med familie og store og små vener. Vi var i Ørsta, der vi først bowla og deretter spiste pizza på den tyrkiske restauranten. Ei kjekk feiring, men noko prega av at bursdagsguten hamna i bowlingkaule saman med storesystera og fekk ein skikkeleg Donaldkul på det eine auget.

Laks på laurdag

2011-11-19T21:24:00.000+01:00

Programmet er tettpakka, med mellom anna jobbing, selskap og konsert, og det blir lite tid og ork til kjøkkenteneste. I dag orka eg ikkje tanken på taco, og vi skal ha pizza i selskapet i morgon, så eg bad ungane tenkje ut noko anna. Svaret kom kjapt: "laks". Eg lurte på om dei ville ha pasta til, men dei ville heller ha kokte poteter. Og brokkoli. Dagens born synest kanskje dette er eksotisk mat?

På Kiwi selde dei no singelpakka kreolsk marinerte laksefiletar som berre kunne pakkast ut og leggast i ei form med skinnsida ned. Fisken stod i omnen medan potetene kokte, og til slutt kokte eg brokkolien. Dette var minimalt med arbeid, og det smakte fantastisk godt. Som saus brukte vi rett og slett rømme rett frå begeret. Måltidet vart toppa med eplejuice som drikke, og vi fekk såleis dekt det meste av dagsbehovet for frukt og grønt. Skulle vi få lyst på meir, har eg fylt kjøleskapet med billeg frukt (First Price).

Eldstejenta arbeider ved ein liten Kiwibutikk, og eg begynner å venje meg til å handle der innimellom. Eg ser at kjeda har ein del gode tilbod, og ikkje minst litt anna vareutval enn der eg handlar til vanleg.

Førehandsomtale i lokalavisa

2011-11-19T15:09:00.000+01:00

12-konsert i Volda kyrkje: søsken i samspel

2011-11-19T14:52:00.000+01:00

Ikkje ein fredag utan?

2011-11-18T23:18:00.000+01:00

Det blir mykje jobbing for tida. Snart tek det laust med heildagsprøver og denslags, men før den tid skal vi gå gjennom ein del pensum, lage prøvene og halde foreldremøte. Særleg det siste tek ein del tid og krefter å førebu, mykje på grunn av manglande rutinar og dårleg datasystem.

Sidan frionsdagen vart ofra, vart det lite tid til å kvile denne veka, og heller ikkje tid til å trene anna enn på tysdag, då eg gjekk ein lang tur. I dag gadd eg rett og slett ikkje, og det var vanskeleg å få skvisa inn ein tur innimellom kjøring og tv-program.

Ungane har også travle dagar, og torsdag begynte fotballtreninga på att for dei to yngste. Veslejenta reiser til Volda etter skulen, er der på ballett og reiser attende til ein times fotballtrening. I tillegg skal både ho og brørne gjere lekser.

Fredag ettermiddag spelar Veslejenta på musikkskulen, medan Storegut i dag først var på bandøving og deretter selde lodd til inntekt for neste års tur til Polen.

Sjølv mekka eg ein kjapp middag, men slo seinare til med ein gigantisk stabel med vaflar som vi kosa oss med etter barne-tv. Eg har stor sans for serien "Vaffelhjarte", og det er koseleg å samlast framfor skjermen heile gjengen for å sjå noko ilag. Slikt var sjølvsagt for nokre år sidan, men no blir det stadig sjeldnare.

God helg til alle blogglesarar!

Multicultural Britain

2011-11-16T22:39:00.000+01:00

Ulla Rahbek er tilsett på engelskavdelinga ved universitetet i København, og dei siste åra har ho arbeidd mest med omgrepet "multikulturalisme" i Storbritannia. I dag var to kollegadamer og eg av garde på kurs for å få ta del i noko av den kunnskapen Rahbek har tileigna seg. Først snakka ho eit par timar om historikk og definisjon av omgrepet, problematiserte og forklarte. Deretter tok ho utgangspunkt i eit essay av Caryl Phillips og ein tale av David Cameron, før ho til slutt tok føre seg den korte romanen "Hello Mum" av Bernadine Evaristo.

Vi fekk utdelt nokre notatar, elles var der ingen filmklipp, ingen PC eller powerpoint-presentasjon - berre ei klok og kunnskapsrik kvinne som snakka fort og førebudd om interessante og dagsaktuelle emne. No får vi berre håpe at eit slikt fagleg påfyll kan kome våre eigne elevar til gode.

Pappa 75 år

2011-11-14T21:14:00.000+01:00

I dag var det sjølve jubileumsdagen, og det passa godt sidan vi hadde tenkt oss til Ørsta på ballett uansett, og sidan dei hadde restar av både det eine og det andre.

Pappa må seiast å vere ein sprek "gæmlis" med glimt i auga og varmt hjarte.

Heimanfrå har eg fått lære at det er ei skam å vere uærleg, egoistisk og/eller snobbete, og at ein skal strekkje seg for å stille opp for borna sine og andre som treng hjelp. Eg har lært å setje det meste i perspektiv og å analysere kva som kan vere bakanforliggande årsaker til at noko er som det er. Vi har framleis gode diskusjonar når vi møtest i familiesamanheng, samtidig som det òg blir tid til både trivialitetar og humor.

Farsdag og bursdagfeiring

2011-11-13T20:11:00.000+01:00

Det har etter kvart blitt ein tradisjon å feire Pappas bursdag samtidig med farsdag. I morgon blir han heile 75 år gammal, og dette feira vi i dag med familietreff og julemat. Dei seks frammøtte barnebarna gjekk ein tur ned til sentrum mellom måltida, men vi vaksne sat nesten planta i stolane og åt det meste av tida. Deilig med ein slik dag innimellom!

Minstemann fekk òg gåver - frå Hareidsgjengen og besteforeldra. Biletet viser då han pakka opp gåva som inneheldt akkurat det han ønska seg aller mest...

Bok 81 2011: "The Curious Incident of the Dog in the Night-time" av Mark Haddon

2011-11-12T19:39:00.000+01:00

15 år gamle Christopher har Aspergers syndrom, ein type autisme som gjer det vanskeleg å skjøne seg på andre menneske. Ein dag finn han naboens hund drepen i hagen, og Christopher begynner å leike detektiv, inspirert av sin store helt Sherlock Holmes. Han skriv dessutan i ei bok om det som skjer, og Haddons roman er den boka. Vi får såleis eit innblikk i korleis verda kan fortone seg for ein autist, noko eg fann fascinerande. Boka er dessutan både spennande og gripande.

Vi bruker læreboka "Experience" i engelsk på VG1-nivå, og der finst eit utdrag av denne romanen. Vi hadde lydboka på engelsk på skulebiblioteket, og eg tenkte eg skulle lese heile boka før vi jobba med utdraget i klassa mi. Opplesaren verkar ung, noko som gjer lydboka meir autentisk. Nokre vaksne stemmer er lagt til med dialog, og her er òg ein del lydeffektar. Eg trur denne boka kunne ha fungert godt som pensum for ei klasse på VG1-nivå, og lydboka kunne ha vore spelt av i klasserommet. Eg trur i alle fall eg skal spele av noko av den når vi les utdraget i læreboka. Det er såpass lett å følgje med i boka at den engelske versjonen kan fungere for dei fleste lesarar med litt engelskkunnskap. For dei som vegrar seg mot engelske bøker, skal boka kunne finnast på norsk med tittelen "Den merkelige hendelsen med hunden den natten".

Bok 80 2011: "Strindbergs stjerne" av Jan Wallentin

2011-11-10T21:08:00.000+01:00

Denne boka har eg brukt lang tid på å kome gjennom. Den er nemleg både lang og komplisert. Etter vaskelappen å dømme skulle dette vere ein actionfylt roman med preg av Indiana Jones, men eg vart skuffa. Berre dei historiske delane, med til dømes fakta frå nazi-tida, var noko i nærleiken av interessante. Sjølve plotet var ikkje særleg engasjerande, spesielt ikkje når ein begynte å bevege seg utover dei realistiske grensene. Eg skal ikkje røpe for mykje av akkurat det, men vil heller legge ved ei bokmelding eg var svært einig i.

Fjelldag på Melshornet

2011-11-10T17:32:00.003+01:00

I dag hadde vi vanleg undervisning fram til lunsj, deretter gjekk vi opp bakkane til skogsvegen som fører til Dinglavatnet. Dit har eg gått to gonger før, siste gong på skuletur i 2004, då Barnefaren vart med og hadde Minstemann i beremeis. I dag gjekk eg vidare opp på toppen av Melshornet. Det var ein lett og fin tur, sjølv om sola ikkje skein slik vêrmeldinga hadde lova.

Fortreffeleg fri-onsdag

2011-11-09T19:47:00.000+01:00

Minstemann og eg hadde ein fin fridag. Vi vart ferdige med leksa hans akkurat til sola kom, deretter rydda vi bilen og gjekk tur bort til naboane. Der leika han ute med naboguten og hunden Pelle, og eg drakk kaffi og prata med nabo T i solveggen. Vel heime laga vi middag til Veslejenta kom frå skulen.

Medan vi kosar oss på denne sida av fjorden, er Storegut utplassert i arbeidsveke på Gitarsenteret i Volda. Sidan eg ikkje tok bilete ute i sola i dag, legg eg inn eit bilete av Storegut når han arbeider på det hardaste. Yrkesvalet hans er ikkje i boks enno, men eg reknar med at han vil velje musikklinja på vidaregåande.

I kveldinga kosar eg meg med ein prøvebunke. Det er godt å jobbe litt inne når ein har vore ute mykje av dagen, og eg gidd ikkje gå tur ute i mørkret i kveld.

Tintin på tysdag

2011-11-08T22:18:00.001+01:00

I kveld har heile familien minus Eldstejenta (som var på ballett) vore på filmen "På eventyr med Tintin - Enhjørningens hemmelighet" på 3D-kino. Det var ein actionfylt film, for å seie det mildt, med høgt tempo og lydnivå. Steven Spielberg er ansvarleg for denne dataanimerte versjonen av den kjende teikneseriefiiguren, og det heile er meisterleg laga. Personleg mislikar eg dei 3D-brillene og kunne godt ha klart meg med 2D, men dei storslåtte kamp- og jaktscenene vert svært imponerande i 3D.

Cup-suppe

2011-11-06T18:07:00.000+01:00

På menyen i dag stod Minestronesuppe. Eg leita på internett etter oppskrifter, og enda opp med å mikse diverse variantar og lage min eigen versjon. Den fall i smak blant små og store suppegjøkar.

2 liter hønsebuljong
om lag 100 gram bacon
300 g kyllingfilet
3 poteter
3 gulrøter
3 stilkar stangselleri
1 lauk
1 boks hakka tomat
1 boks erter (det skal eg droppe neste gong)
om lag 100 g makaroni
salt, pepar og diverse urter

Eg bruna bacon, kjøt og dei finkutta grønsakene før eg putta det i krafta. Der fekk det heile småkoke ei stund medan eg kokte pastaen. Så tilsette eg tomatar og pasta, og til slutt ertene.

Minestrone er ein litt annleis versjon av brennsnut, og det fall som nemnt i smak. Til dessert hadde eg laga karamellpudding (av pose), og så hadde vi krem attåt. Til ein så lett middagsrett er det godt med dessert.

Søndagstur eller cupfinale?

2011-11-06T17:56:00.000+01:00

I dag skulle familien samlast til cupfinale og middag. Sidan sola skein og temperaturen var fin, gjekk Barnefaren, Minstemann, hundane og eg tur på Gamlegjerdet under første omgang av cupfinalen. Andre omgang tilbragte eg stort sett ved kjøkenbenken. Ålesund vann over Brann, og det er vi patriotiske nok til å sette pris på.

Laurdagsjobb

2011-11-05T22:04:00.000+01:00

I dag sette vi alle klutar til, bokstaveleg tala, og vaska og rydda andre etasje skikkeleg grundig. Eg hadde fått besøk av ei kjøtmeis på soverommet i dag tidleg, og det er utruleg kor mykje ein liten fugl kan rote på ei lita morgonstund. Ungane rydda og vaska sine eigne rom, og som vanleg fekk eg fylt opp vaskemaskina etter at dei var ferdige.

Minstemann og eg tok oss ein biltur av stad for å forhandle om nokre møblar, og etterpå gjekk vi oss ein tur ut for å få i oss frisk luft medan Storegut støvsugde i første etasje. På heimvegen møtte vi på naboguten, så då enda Minstemann på kompisbesøk. Eg gjekk meg ein tur aleine før eg kjørte Storegut på besøk til ein av hans kompisar. Veslejenta er framleis sjuk, og resten av ettermiddagen låg ho rett ut medan eg sat med ein rettebunke.

Eg gjekk av stad og henta Minstemann, laga lasagne og fekk i dei to små ein stor porsjon mat kvar før dei inntok ein enda større porsjon laurdagsgodt.

Det har gått i retting (ferdig 21.15, då eg oppdaga at eg mangla to utskrifter), TV og data utover kvelden. Vi kosar oss, men det er trist med henne som ligg rett ut og hostar. I dag trur eg ho har halde seg vaken det meste av dagen, og det er sikkert eit godt teikn.

Med vaffelhjarta på rette måten

2011-11-04T21:46:00.002+01:00

Veslejenta er sjuk. Ho ligg rett ut på sofaen og jamrar i søvne, hostar og er slapp. Appetitten er så som så.

Sidan eg hadde høve til å stele meg til ein rask retrett til heimen, vart det til at jenta var aleine heime ein del av dagen medan eg var på jobb. Då eg kom heim hadde ho ikkje smakt matbiten, og eg greidde å freiste henne med eit karbonadesmørbrød. Seinare laga eg vaflar med meierismør og rømme (i og på), men det greidde ho ikkje å få i seg.

Vi andre meska oss med vaflar før Barne-tv, der serien Vaffelhjarte er blitt ein stor favoritt. I serien et dei alltid opp vaflane sine, men det gjer vi aldri her i huset, sjølv om eg prøver å lage ei lita røre.

Jobb på fri-onsdag

2011-11-02T18:39:00.000+01:00

Sidan eg er kontaktlærar, måtte eg i dag stille på jobb i samband med ei stor satsing på psykisk helse blant ungdom - det såkalla VIP-prosjektet. Emnet er både viktig og alvorleg, og i dag var det fagfolk som skulle leie seansen i klassane. Vi kontaktlærarane var der mest for å lytte, så vi kan bruke økta som referanse seinare.

Veslejenta hostar framleis, men ho var med på jobb sidan ho hadde skulefri. Minstemann var òg med. Dei fekk rigge seg til med DVD-spelar og kanon på eit klasserom medan eg var saman med klassen. I ein pause mellom øktene fekk vi dessutan tid til å stikke innom ein møbelbutikk for å kike og få rettleiing. Vi reiste derifrå med ein bunke brosjyrar, og ut på nyåret satsar vi på å handle.

Vi tok 15.30-ferja, henta Storegut på konfirmasjonsførebuing i kyrkja og for deretter heim til klokka var 16.30. Då gjekk sola ned bak fjella.