Måndagen regna det utan stans, så då vart det ikkje nokon tur. Hundane, og då spesielt vesle Bjarne, e ikkje så begeistra for regn og kulde. Det vart leik i hagen i staden.
Tysdag, derimot, var det nokså lettskya og for det meste opphaldsvêr, eller "finevêr", som vi kallar det denne sommaren. Eg var aleine, sidan Bladfyken var ferdig med ferien sin, og eg pakka hundar og band inn i bilen og køyrde mot Folkestad. Eg var usikker på kvar eg skulle gå, men enda opp med å parkere ved bommen og gå opp på setra. Planen var å gå rundt vatnet, men det vart til at vi gjekk til enden av vatnet og snudde ved grinda. Der låg det ein flokk kyr og venta på oss, og det orka eg ikkje. Vi hadde allereie gått forbi to kuflokkar, nokre sauer og fleire turistar, og det var slitsamt med fire nysgjerrige (og delvis bråkete) hundar. Eg trur eg skal vente til kyrne er borte frå setra før eg går der att, i alle fall viss eg har alle hundane med.
Turten starta ved eit industriområde i nærleiken av Remmedalen/Hjelmelandsdalen ein stad, og den var verkeleg godt merka. Vi gjekk på sti, grusveg og traktorveg før vi kom til sti att. Den gjekk bratt og var til tider sleip og glatt, men vi kom oss opp, trass fire hundar og ein udugeleg arm. Dei einaste store problema vi opplevde, var då vi møtte hundar, noko som skjedde to gonger. Eg trua med å melde heile kvartetten på "Fra Bølle til Bestevenn". Det vafrt for langt å gå for vesle Bjarne, så han måtte sitje i sekken over halve turen. Han var likevel temmeleg sliten då vi kom attende til bilen.
Fordelen med å gå såpass lange turar, er at ein får ein fredeleg kveld.
Denne dagen var det kald vind og litt regn. Bladfyken og eg tok med hundane til Litlebøvatnet i Dalsbygda, og der gjekk vi utover ein traktorveg. Utsikta var fin og vi kunne godt ha gått lengre, men vêret var ufyseleg.
Dei vaksne ungane kom heim på besøk, og det vart nokre kjekke dagar med tur, båttur og brettspel, blant anna. I tillegg fekk eg hjelp til innkjøp og bilreparasjon før turen til Solund.
Gjengen kosar seg saman når dei er samla. I sommar blir dei mykje samla då Veslejenta og eg skal skifte på å passe dei medan den andre er på ferie.
Pinsedag gjekk vi tur i Løndalen på Folkestad. På veg attende til bilen møtte vi Veslejenta med mann, svigerforeldre og hundar, og vi fekk helse på vesle Bjarne. Hundane sprang mykje rundt, men veslekvelpen var våt og kald, stakkars. Han er ein tøff type som veks fort, og dei kraftige labbane vitnar om at han kan bli stor.
18. mai fylte dei to brørne 3 år! Dette vart feira med "kake" i hagen, og Charlie var gjest.
15. mai var ein inneklemd fredag. Veslejenta og Svigerson skulle på besøk for å sjå sin nye kvelp, og eg sa eg kunne passe Albert så lenge. Dei skulle reise tidleg på dag, og allereie klokka 10 henta eg Albert og gjekk tur med alle tre hundane. Når ein går frå parkeringsplassen nede ved bommen får ein ekstra trim, og denne dagen hadde eg rikeleg tid til å rusle opp bakken, rundt vatnet og ned att. Inkludert fotoshoot i enden av vatnet tok turen om lag to timar, så vi fekk rikeleg trim og frisk luft. Resten av dagen kosa vi oss heime med leik i hagen og kvile på verandaen og inne. Albert vart henta seint på kveld, og han skjøna lite av kva som hadde skjedd, trur eg. På måndag har han bursdag, og då får han ein liten bror i presang.
28. april vart gamlegutten 12 år. Han er framleis sprek og leiken, men i fjor sommar hadde han ein periode der han halta og verka støl i kroppen. Då trudde eg det leid mot slutten for han, men så kvikna han til då ferien var over. No går han lange turar, hoppar opp i sofaen og herjar med Dennis som før. Det er eg umåteleg takksam for, for eg vil gjerne behalde han lenge enno. Han er ein heilt spesiell fyr som eg er veldig glad i.
Denne ferien vart litt annleis enn vanleg, sidan ingen born kom heim og Veslejenta reiste til Tenerife. Eg hadde ingen store planar for ferien, anna enn å slappe av, gå turar og prøve å lade batteria. Sidan Bladfyken har kjøpt seg ny bil, vart det kjekt å køyre ut på tur, og ein av dagane henta han mamma og tok oss med til Eid på besøke til tanta mi der. Elles har vi gått tur i Mjeltvika, ved og på det djupfrosne Hovdevatnet, i Løndalen, frå Melheim nesten til Navelsaker og i Mulevika i Herøy. Eg har ikkje opna ei skulebok på over ei veke, men i dag (søndag) har eg jobba meg frampå med planlegging av komande veke. Det blir hardt å begynne på jobb att, for no kjem ein travel periode med prøver og eksamensførebuing. Heldigvis er det berre fem veker før det så er ferie att.
Laurdag kveld køyrde vi til Eid etter jubileet var overstått, og deråt vi pizza på kafeen Cats. Søndag, derimot, laga vi pinnekjøtmiddag, så då vart det meir stil over sakene. Måndag køyrde Storegut og Sambuaren til Eid for å handle, for vi supplerte pinnekjøtrestane med salat og knekte poteter med ost og kryddersmør. Eg har sett oppskrift på slike poteter før, men aldri laga det. Det viste seg å vere ein lett og god måte å bruke potetrestar på.
Tysdagen hadde Storegut bursdag og vart heile 28 år. Han ville lage bursdagsmiddag sjølv, og det vart ein aldeles nydeleg lasagne - mykje meir forseggjord enn den eg plar lage. Sambuaren laga gulrotkake, og Eldstejenta og eg laga smashkake etter ei oppskrift vi ikkje hadde prøvd før. Det var eigentleg ei enkel kake å lage, med marengs med Ritzkjeks, sjokoladekrem, vaniljekrem, krem og smash. Eg sa vi kunne eksperimentere med ei ny oppskrift sidan vi hadde ei anna kake i bakhand.
Påskedagane gjekk mykje med til matlaging og rydding av kjøken, men det vart òg tid til prat, quiz og litt tv-serie og film. Onsdagen vart det restemiddag og kaker til frukost/lunsj, og så reiste ungane til faren. Dermed fekk eg eit par rolege dagar før vi alle reiste til Hareid i familieselskap. Systera mi hadde invitert heile hurven til dei i og med at både juristsonen var der, i tillegg til Niesa med sin vesle familie. Vi trefte dei på ferja onsdag, så vi hadde allereie sett det nye vedunderet i familien. Mamma er no oldemor til to skjønne gutar, og det var sjølvsagt dei som fekk mest merksemd i selskapet.
Laurdag kveld skulle Storegut og Sambuaren på quizkveld på Bjørkedalen, så då kom dei hit og overnatta, før dei reiste heim til Trondheim på søndag. Det vart stille i huset då, og eg tok med meg hundane og gjekk ein lang tur i Fladalen (frå Tua og innover). Det fanst ikkje eit snøfnugg i skiløypa, som er grusveg i sommarhalvåret. Eg likar det best slik, og det var ein nydeleg ettermiddag/kveld.
På denne turen møtte eg eit eldre ektepar som eg kom i snakk med. Mannen fortalde at han hadde vore med på å setje stikker og bygge vegen på midten av 1960-talet. Dei skulle gå tur til Asbjørnstova, og mannen fortalde at denne varmehytta har namn etter den første satanisten på Hjelle skule. Asbjørn var ein medelev av mannen, og dei hadde kristendomsundervisning. Asbjørn vart spurd om han kunne seie det fjerde bodet. Svaret laud: "Du skal ære djevelen og alle hans gjerningar".
I dag er det andre påskedag, og kvardagen sig innover meg. Eg bakar brød, festar trådar, vaskar klede - og det vert vel noko husvask etter kvart òg. Litt skulearbeid har eg òg fått unna, men eg har heldigvis ikkje hatt rettebunkar i påska. Komande fredag brakar det laust med dei første heildagsprøvene, og så går det slag i slag fram til sommarferien. Eg set pris på lyse kveldar som gjer dagane lengre og energien betre.
I dag kom våren attende, med tosifra temperatur og sol frå blå himmel. Eg bestemte meg for å gjere trimmen kortreist, og gjekk heimanfrå til Lisjedalen og innover skogsvegen langs vatnet. Det vart noko oppoverbakke, og det er som kjent då det går oppover - også med forma. Eg møtte fleire kjende på turen, blant andre ein tidlegare kollega eg ikkje hadde sett på 25 år, trur eg. Note to self: sjølv om du berre skal gå ein tur i nærmiljøet, kan det vere greitt å sjå ok ut, i tilfelle ein treff på folk ein sjeldan møter.
