Tur til Oslo og Stockholm

I år ville vi ha ein roleg ferietur med byopplevingar, og valet fall på Stockholm. Bladfyken hadde vore der før, og eg hadde vore i utkanten av byen på ei hundeutstilling ein gong i tida. Ingen av oss hadde verkeleg utforska byen. Etter ein del vurdering fann vi ut at vi ville ta tog frå Otta til Oslo, bli der eit par netter og deretter reise vidare. På Otta kan ein parkere gratis nokre få meter frå stasjonen, og vi kom i god tid såpass vi tok oss ein matpause før vi sette oss på toget. Det var verkeleg avslappande, då ingen masa om å sjå billettar eller om at vi måtte kjøpe noko, så vi fekk roe oss skikkeleg ned med bok, strikking og søvn, alt ettersom.

I Oslo hadde vi bestilt to netter på Plaza, som ligg rett utanfor Oslo S. Ekstremt praktisk, og ikkje så dyrt som ein kunne frykte. Rommet var fint og stort, så vi hadde ingenting å klage på. Det vart ikkje til at vi testa badebassenget på hotellet, fordi vi ikkje ville drage med oss vått badetøy vidare på reisa, og eg visste ikkje at der var basseng før vi kom. 

Då vi kom fram, kontakta eg Eldstejenta, som tok med seg venninna og møtte oss til middag på Balthazar, i bakgarden til domkyrkja. Eg var der i fjor då eg besøkte Eldstejenta, og eg syntest liksom vi fekk sydenstemning der. Etterpå vart jentene med oss til hotellet og baren i toppetasjen. Der var smekkfullt, men Eldstejenta hadde ringt ei venninne som jobbar der og fått henne til å reservere bord til oss. Det var veldig hyggeleg!

Neste dag gjekk Bladfyken og eg på museum. Han hadde ikkje verken sett det nye nasjonalmuseet eller det nye Munchmuseet, og det var mykje av grunnen til at vi tok oss ein dag i Oslo. Middagen tok vi på ein italiensk restaurant like ved Munchmuseet, og då var det kort veg attende til hotellet etterpå.

Dag tre tok vi tog til Stockholm, og der låg vi på eit Radissonhotell like ved sidan av sentralstasjonen der. Det var tydelegvis eit litt skumlare strøk, men der stod drosjer parkerte til ei kvar tid, og det kjendest litt trygt. Vi kom fram tidleg kveld, og etter å ha fått tinga våre på plass, gjekk vi til Gamla Stan, der vi sightsa litt og åt middag på caféen "Kaffekoppen" i det berømte raude huset på torget. Bladfyken sette att sekken sin der, men fekk den attende neste dag. Det var nesten eit under, spesielt sidan han hadde lagt ei lommebok med kontantar i sekken. Gamla Stan vart den staden vi tilbragte mest tid i, for der var veldig triveleg med fine gamle hus og smale gater. 

Dag fire for vi til Wasamuseet og såg det gamle skipet som vart berga opp av vatnet 333 år etter at det forliste. Skipet var eit imponerande syn. Etterpå skulle vi eigentleg på Abbamuseet, men der var lang ventetid. Systa hadde sendt meg melding om at dei var i Gamla Stan, og vi tok båten dit og møtte dei til bursdagsfeiring på ein liten café i Vesterlånggatan. Vi gjekk opp på torget saman med dei òg, før dei skulle reise attende til Uppsala. Vi skulle handle litt souvenirar og liknande, så vi vart verande litt lenger. Då begynte det å blåse kraftig, og det var nesten strabasiøst å kome seg over bruene heim til hotellet. Vel framme stakk eg i badebassenget. Vatnet der var ikkje så varmt, men eg kunne òg ta boblebadi varmt vatn og "bara bada bastu". Denne kvelden hadde eg anlegget for meg sjølv mykje av tida, og det var veldig deilig. Bassenget var lite, men der var veldig reint og fint. Etter badet spiste vi middag på ein thairestaurant like ved hotellet.

Dag fem for vi tidleg til Abbamuseet for å unngå kø. Det var eit morosamt museum med mykje musikk og film, blant anna. Museumsbutikken var ein skuffelse, men noko skal ein ha å klage på. I fjor var vi på Beatlesmuseum, og heile Liverpool var full av "merch". Etter Abbamuseet gjekk vi til Skansen, der vi tilbragte det meste av dagen. Der var utruleg mykje å sjå, både gamle hus, rosehage med statue av Linné, dyrehage, musikalshow med meir. Vi rusla roleg rundt og såg på det meste, og til slutt enda vi opp på ein café der vi skulle bestille rekesmørgås, men dei var utselde. Elles var det ein veldig kjekk dag.

Dag seks hadde vi tenkt å leige bil og køyre oss ein tur ut av byen, men vi enda opp med å gå på Nordiska Museet, som var eit veldig flott museum. Der var møblar, dekketøy, klede, kunst, kvardagsting og liknande frå ulike periodar, slik det plar vere på museum, men der var òg forteljingar om einskildmenneske som ein kunne høyre på. I tillegg var det eit flott bygg. Då vi kom ut, hadde det begynt å regne. Vi hadde tenkt å ta eit båtcruise viss vêret tillet det, men det gjorde det altså ikkje. Vi tok eit minicruise over med båten til Gamla Stan ein siste gong, rusla litt i gatene og fann ein café der eg endeleg fekk meg ein rekesmørgås. Vel heime på hotellet gjekk eg i bassenget att, sidan eg allereie var gjennomvåt.

Dag sju sjekka vi ut og gjekk rundt hjørnet til sentralstasjonen. Det var ingen problem med togturen denne gongen heller, og vi fekk oss ein pause på Oslo S såpass vi fekk oss middag og kaffi før vi reiste vidare til Otta. Der stod bilen og venta. Klokka var då 21.30, og vi hadde ein del problem med å halde oss vakne på turen heim. Det vart nokre pausar med frisk luft og cola, og til slutt var vi trygt heime.

Begge var samde om at det hadde vore ein kjekk tur, at det er fint å reise med tog og at Oslo Plaza skal vere favoritthotellet i Oslo framover (eg reknar med at ein skal dit igjen). Høgdepunkta i Stockholm meiner eg var Gamla Stan, Nordiska museet og Skansen, og så var det kjekt med den skyssbåten, som var omtrent som "Sundbåtan" i Kristiansund. 

Genser nummer 77: "Anny" av Dorthe Skappel

Eldstejenta ville gjene ha ein slik genser, men dei var lenge utselde på nett. Då den kom attende for sal, bestilte og strikka eg den - men trådane har eg ikkje festa før i dag. Det er den keisame delen av strikkearbeidet. I strikkepakken var der like mengder gult og turkis garn, så eg løyvde meir enn to nøster turkis. Det er irriterande, for tråd er dyrt for tida. Likevel hadde det vore verre dersom det hadde vore for lite garn, så eg trøystar meg sjølv med at eg sikkert finn noko å bruke restegarnet til. Genseren var kjekk å strikke, etter kvart som mønsteret vart "logisk".

Genser nummer 76: "Efterår" til meg sjølv

Før påske strikka eg ferdig min tredje genser i flettemønsteret "Efterår" i Eco Highland Wool. Eg fall pladask for fargen "Lys jeansblå" (kode 222), for den er i ein gråblå nyanse som er litt mørkare enn yndlingsfargen min. Både denne gongen og førre gong eg strikka etter dette mønsteret har eg måtta rekke opp om lag 15 cm undervegs fordi eg har gløymt eit flettemønster, for mønsterstrikk krev konsentrasjon og nøyaktigheit. Eg fører nøye teljing på eit papir når eg strikkar, slik at eg kan telje kvar eg er i rapportane (der er tre ulike, men dei to på sidene er den same men speglvend). Eg likar godt garnet, og i påska fall eg for freistinga og bestilte meir. Det første eg skal strikke er ein herregenser som ikkje er same mønster, for den ville Minstemann ha. Først skal eg fullføre eit par andre påbegynte prosjekt - eller i alle fall eitt av dei. 

Teppe til Albert

Etter å ha sett litt på bloggen ser det ut til at eg ikkje har lagt ut bilete av eit babyteppe eg gav sonen til niesa mi i haust, og eg finn ikkje bilete av det på telefonen heller. Eg har uansett strikka eit tredje teppe - denne gongen til hunden Albert. Han har lite underull og tynn pels, så han er ofte frostig og vil gjerne ligge på fanget mitt når eg strikkar. Eg har derfor brukt noko restegarn til å strikke eit teppe til han, og det skal lukte "bestemor" så han slepp å sakne meg når han er andre stader. 

Påska 2025

I år var det sein påske, og vi har hatt nydeleg vårvêr det aller meste av påskeferien. Allereie fredag kveld før påske kom dei første gjestane, nemleg Eldstejenta, Storegut og sambuaren hans. Dei to yngste ungane var komne før eg kom frå jobb, og vi hadde ein roleg ettermiddag/kveld medan vi venta på innrykk. Neste dag var det jubileumsmarkering for det lokale korpset, der dei tre eldste har spelt tidlegare. Korpset er no relativt lite aktivt, med ad hoc-framføringar til 17. mai og julegrantenning, så dei to yngste har spelt i eit anna lokalt korps i fleire år. Minstemann har no slutta, men det er ikkje lenge sidan han steppa inn for ein sjuk trommeslagar. Jubileumsmarkeringa var veldig vellukka, med fullt grendahus og flott musikk. Også kjærasten til Veslejenta kom for å feire, så vi var mange samla og vart dermed også foreviga av ei nabodame/vinklubbvenninne. Eg er heldig som får omgi meg med så mange kjekke, unge menneske både på jobb og privat.

Laurdag kveld køyrde vi til Eid etter jubileet var overstått, og deråt vi pizza på kafeen Cats. Søndag, derimot, laga vi pinnekjøtmiddag, så då vart det meir stil over sakene. Måndag køyrde Storegut og Sambuaren til Eid for å handle, for vi supplerte pinnekjøtrestane med salat og knekte poteter med ost og kryddersmør. Eg har sett oppskrift på slike poteter før, men aldri laga det. Det viste seg å vere ein lett og god måte å bruke potetrestar på.

Tysdagen hadde Storegut bursdag og vart heile 28 år. Han ville lage bursdagsmiddag sjølv, og det vart ein aldeles nydeleg lasagne - mykje meir forseggjord enn den eg plar lage. Sambuaren laga gulrotkake, og Eldstejenta og eg laga smashkake etter ei oppskrift vi ikkje hadde prøvd før. Det var eigentleg ei enkel kake å lage, med marengs med Ritzkjeks, sjokoladekrem, vaniljekrem, krem og smash. Eg sa vi kunne eksperimentere med ei ny oppskrift sidan vi hadde ei anna kake i bakhand. 

Påskedagane gjekk mykje med til matlaging og rydding av kjøken, men det vart òg tid til prat, quiz og litt tv-serie og film. Onsdagen vart det restemiddag og kaker til frukost/lunsj, og så reiste ungane til faren. Dermed fekk eg eit par rolege dagar før vi alle reiste til Hareid i familieselskap. Systera mi hadde invitert heile hurven til dei i og med at både juristsonen var der, i tillegg til Niesa med sin vesle familie. Vi trefte dei på ferja onsdag, så vi hadde allereie sett det nye vedunderet i familien. Mamma er no oldemor til to skjønne gutar, og det var sjølvsagt dei som fekk mest merksemd i selskapet. 

Laurdag kveld skulle Storegut og Sambuaren på quizkveld på Bjørkedalen, så då kom dei hit og overnatta, før dei reiste heim til Trondheim på søndag. Det vart stille i huset då, og eg tok med meg hundane og gjekk ein lang tur i Fladalen (frå Tua og innover). Det fanst ikkje eit snøfnugg i skiløypa, som er grusveg i sommarhalvåret. Eg likar det best slik, og det var ein nydeleg ettermiddag/kveld.

På denne turen møtte eg eit eldre ektepar som eg kom i snakk med. Mannen fortalde at han hadde vore med på å setje stikker og bygge vegen på midten av 1960-talet. Dei skulle gå tur til Asbjørnstova, og mannen fortalde at denne varmehytta  har namn etter den første satanisten på Hjelle skule. Asbjørn var ein medelev av mannen, og dei hadde kristendomsundervisning. Asbjørn vart spurd om han kunne seie det fjerde bodet. Svaret laud: "Du skal ære djevelen og alle hans gjerningar". 

I dag er det andre påskedag, og kvardagen sig innover meg. Eg bakar brød, festar trådar, vaskar klede - og det vert vel noko husvask etter kvart òg. Litt skulearbeid har eg òg fått unna, men eg har heldigvis ikkje hatt rettebunkar i påska. Komande fredag brakar det laust med dei første heildagsprøvene, og så går det slag i slag fram til sommarferien. Eg set pris på lyse kveldar som gjer dagane lengre og energien betre.

Genser nummer 75: "Luna" til Eldstejenta

Eg skulle eigentleg strikke ein "oversized" genser til Eldstejenta og sende den i posten til bursdagen hennar, men så vart genseren berre vanleg passeleg, så eg let den ligge til ho kom heim til påske. Tråden er "Alpaca bris", og den lysaste rosafargen er den same eg har strikka til henne i før. Ho vart svært glad for genseren, men eg har bestilt ein Skappel-genser som eg skal prøve å få større.

Mamma 85 år!

Då mamma vart 80, fekk vi ikkje vere saman i det heile, då landet nett hadde blitt stengt ned og covid-restriksjonane styrte liva våre. I år vart mamma 85, og dei av oss som bur i nærleiken møttest i Starevegen til ei enkel og uformell feiring. Det var berre to barnebarn til stades (av 11), så det vart ikkje barnebord i dette selskapet. Systera mi hadde laga nydelege smørbrød, mamma hadde baka og eg hadde med ei marsipankake, så det var nok mat og mykje å prate om. Jubilanten fekk gåver og blomar, og det vart ei hyggeleg feiring for alle.

Lisjedalen 22. mars

I dag kom våren attende, med tosifra temperatur og sol frå blå himmel. Eg bestemte meg for å gjere trimmen kortreist, og gjekk heimanfrå til Lisjedalen og innover skogsvegen langs vatnet. Det vart noko oppoverbakke, og det er som kjent då det går oppover - også med forma. Eg møtte fleire kjende på turen, blant andre ein tidlegare kollega eg ikkje hadde sett på 25 år, trur eg. Note to self: sjølv om du berre skal gå ein tur i nærmiljøet, kan det vere greitt å sjå ok ut, i tilfelle ein treff på folk ein sjeldan møter. 

14. mars: tur til Bremanger

Eg har ikkje så mange fri-fredagar, men denne gongen klaffa det med at Bladfyken også hadde fri, og vêret var fint. Sidan Veslejenta skriv master, enda det med at Bladfyken og eg for på tur saman med små-hundane, medan Charlie og Veslejenta vart att heime. Vi køyrde til Måløy og tok ferja til Oldeide, og derifrå køyrde vi til Grotlesanden. Der var utruleg fint, og eg kan godt tenkje meg å reise attende dit. Ved den gamle kyrkjegarden på Grotle kom vi i snakk med ein lokal bonde, og han kunne fortelje oss mykje om turmoglegheiter i nærleiken, om krigen og om orkanen Dagmar. Det vart ei bonuoppleving. Etter kvart køyrde vi til Kalvåg, der eg ikkje hadde vore før. Ingen kaféar var opne, dessverre, så også dit vil eg gjerne attende i sesongen. Det er mykje dårlege vegar på Bremangerlandet, så vi enda med å ta ferja til Måløy på heimvegen òg, sjølv om vi eigentleg skulle køyre til Isane. Frå Måløy er det autostrada inn til Eid, og då er det kjekkare å slappe av og prate. På Eid stoppa vi og handla med oss pizza heim til studenten.

Oppkøyrsla før og no

Det har vore periodar med svært mykje regn siste månadane, og i ein slik periode vart oppkøyrsla vår totalt øydelagd. Det viste seg at eit dreneringsrøyr hadde tetta seg med stein og mold, men i tillegg var det opp i 80 mm nedbør på eit døgn, så det vart for mykje overflatevatn å handskast med. Eg gjorde mitt beste med å opne opp grøft og rør for å få unna det vatnet som kom sigande, og så ordna Bladfyken med to lastebillass med sand og ein mann med traktor, slik at alt vart fiksa medan eg var på jobb. Det var ei ufatteleg lette.

Vinterferien 2025

I veke 8 hadde vi fri, og Eldstejenta hadde ferie samtidig. Ho kom midt i veke 7, slik at nokre av oss fekk gått på musikalen til musikklinja på skulen der eg jobbar. Det var som vanleg veldig kjekt og imponerande. Elles gjekk dagane med til turgåing og matlaging, litt besøk og mange gode samtalar. Det vart ikkje tatt så mange bilete, men det var nydeleg vêr nesten heile ferien, og då regnet kom kunne eg rette unna det arbeidet eg hadde tatt med heim i ferien.

Genser nummer 74: "Blanca-genser" i Alpaca Dream

Då det var Black Friday sal, låg det ute fleire strikkepakkar med genserar i svart og kvitt. Eg bestilte denne i raudt og kvitt i staden, og eg strikka den i medium storleik, slik eg plar når eg strikkar til meg sjølv. På biletet såg den ganske stor og romsleg ut, men den ferdigstrikka genseren såg ut som ein barnegenser. Eg vaska den, strekte den i erme og bol før eg hengde den opp på ein kleshengar, noko ein vanlegvis unngår. Resultatet vart at genseren er stor nok, men litt tilsitjande. Eg trur det vil kome seg når eg bruker den meir. Eg vart litt sur av heile prosjektet, for eg likte mønsteret ganske godt.

Genser nummer 73: "Etterår" til Veslejenta

 Etter å ha strikka ein genser til meg sjølv i dette mønsteret, strikka eg ein til Veslejenta òg, i same garn (Eco Highland Wool) men i ein flaskegrøn farge som ho kler veldig godt. Eg gjorde nokre justeringar på ermane, som var litt korte og trange på min eigen. På St Patrick's Day lånte eg den attende for å ha på meg noko grønt.