8. mai

På jobb har vi festlege dagar med russefeiring, og tolmodet til lærarane vert testa. Tysdag var det ein nydeleg sommardag, og då passa det godt med russebilkåring. Ingen stad er finare enn Sunnmøre i mai, og ingen månad er vakrare heller. Grøn natur, kvite fjelltoppar og russefeiring er eit perfekt bakteppe for alle flaggdagane.

Eg fekk elles levert ein nydeleg bukett frå to studievenninner, det sette eg stor pris på!

Om kvelden gjekk vi tur på Stigedalen. Der var framleis ein del snø på vegen, men vi gjekk inn til Asbjørnhytta. Den var eit sørgjeleg syn, for heile den fine grillhytta hadde falle saman i løpet av vinteren. Eg reknar med det var snømengder som tok knekken på den.