fredag 31. desember 2021

Jula 2021



Veslejenta var den første julegjesten som kom heim, og det allereie ei veke før planlagt på grunn av heimeeksamen. Etter kvart kom også Storegut, og eg hadde dei siste to arbeidsdagane heime på grunn av nedstengd skule. Det var heilt greitt å sleppe å ta laust i gryotta, for det var mykje å gjere i heimen. Veslejenta hjelpte meg med å kjøpe dei siste gåvene, medan Minstemann vart med på mathandel for å hjelpe til med å bere. Det vart ein del handlenett.

Dei siste to julegjestane kom på vesle-veslejulaftan. Eldstejenta hadde med seg kjærasten sin, som vi andre aldri hadde møtt og det vart ekstra hyggeleg. Veslejulaftan reiste alle ungdomane på raid for å besøke far og mormor og hente gåver, medan eg vart att heime og laga potetsalat og graut tl dei kom heim. Deretter pynta vi juletre, tradisjonen tru.

Julaftan var vi i kyrkja, der vi hadde bestilt plass på førehand. Det var litt rart å sitje der med munnbind, men svært stemningsfullt med nydeleg song og musikk.

Kjærasten til Eldstejenta er kokk, derfor fekk eg god hjelp til å steike svineribbe i år. Vi plar ikkje ha begge delar på julaftan, men det tru eg vi skal få som ny tradisjon no når vi er så mange. Storegut laga rabbestappe, det er òg ein fin tradisjon å innføre, synest eg. Kokkekjærasten hadde laga ostekake til dessert, men det vart midnatt før vi kom til desserten.

Det var mange fine, nyttige og morosame pakkar under treet, og nytt av året var at vi heldt på med "pakkeleiken" før dei skikkelege pakkane vart pakka ut. Julaftan vart svært vellukka og hyggeleg.

Første juledag var ein roleg dag, slik tradisjonen tilseier, men Eldstejenta og eg gjekk ein tur i Mjeltvika. Det hadde snødd mykje på julaftan, så julestemninga var på topp.

Andre juledag reiste alle til Mormora i Ørsta, der også kjærasten til Minstemann dukka opp, i tillegg til ein bataljon frå Hareid. Mormora hadde laga ei stor panne med gulasj, og i tillegg fekk vi dessert og fleire kaker til kaffien. Ho hadde verkeleg stått på, og vi hadde ein triveleg dag saman.

Etter familieselskapet reiste eg heim aleine, medan ungane for til faren. No fekk eg ro til å rette ein tentamensbunke eg hadde på vent, og til å strikke ferdig ein genser til Minstemann. Litt feriering og besøk fekk eg òg høve til.

Denne rapporten kom for seint til å ønske alle god jul, men eg kan i alle fall ønske alle ei finnyttårsfeiring og eit godt nytt år.

Bok 72 2021: "Skyggenes time" av Sophie Hannah


 Ei kvinne har hatt eit forhold til ein gift mann, og då han ikkje dukkar opp til deira faste avtale, kontaktar ho politiet. Dei trur henne ikkje, og ho anklagar mannen for brutal valdtekt for å få dei til å agere. Boka utviklar seg til å bi svært dramatisk, og kanskje ikkje så veldig realistisk, men dette er god underhaldning.

Bok 71 2021: "Stoisk uro og andre filosofiske smular" av Agnes Ravatn

 I denne boka skriv Ravatn om filosofi frå sin eigen synsvinkel, noko som gjer den langt meir underhaldande enn ei rein filosofibok ville ha vore. Etter å ha teke nokre vekttal og studiepoeng i filosofi visste eg mykje av det ho skriv om frå før, men det var likevel kjekt å lese hennar vinkling på emnet.

Bok 70 2021: "Folkelesnad" av Agnes Ravatn


 Dette var ei underhaldande bok om vekeblad, for det meste. Ein gong i studietida skreiv eg ei oppgåve om "dameblad" versus "mannfolkblad", og det er mykje dette denne boka tek føre seg. Ravatn skriv godt og underhaldande med mykje humor.

Bok 69 2021: "Felemakaren" av Edvard Hoem


I serien om forfedrane sine har Hoem denne gongen kome til ein mann som levde i Romsdalen tidleg på 1800-talet,og som opplevde krig og fattigdom. Etter kvart lærer han seg å bygge feler, derav tittelen. Hoem les lydboka sjølv, og det e ei god bok om fattigdom, kjærleik og handverk.

mandag 20. desember 2021

Genser nummer 20: "Hvammur" til Storegut


Andre barn i advent kom heim til mor, og der venta ein genser som har lege ferdig strikka ei stund, men som eg monterte og vaska sist fredag. Genseren er strikka i Alafosslòpi, og mønsteret heiter Hvammur. Den sat som støypt, og guten var vel nøgd. han treng var,e klede i Bartebyen, der det ofte er kaldt, og der han jobbar deltid i SFO og er mykje ute.

lørdag 11. desember 2021

Genser nummer 19: Hjertegenser til Veslejenta

 Veslejenta kom heim ei veke før planen, så dei siste trådane vart festa dagen etter at ho kom heim. Denne hjertegenseren vart strikka i small, i fargane grå og dyp rød (som eg hadde att etter min eigen). Både mor og dotter hadde på genserane då vi var på førjulsvisitt i Ørsta med Mor/mormor. 


Genser nummer 18: Hjertegenser i Hillesvåg Varde

Eg hadde lyst på ein lilla adventsgenser, men tenkte at to tweedgenserar vart litt i overkant. Med litt hjelp frå eksperten på butikken enda eg opp med garnet Hillesvåg Varde, i ein nydeleg lillafarge og ein grårosa. Fasongen vart som på den første, men det vart liksom ein heilt annan genser utan det tweedpreget.


Genser nummer 17: Hjertegenser i Alpakka Tweed

Denne genseren var rask å strikke, og garnet er veldig mjukt og godt å jobbe med. Eg strikka den i medium storleik i fargane dyp rød og natur. Eg løyvde fleire nøste, derfor bestilte eg meir garn for å få bruke opp restane til eit anna prosjekt.


søndag 28. november 2021

Bok 68 2021: "Den røde adresseboken" av Sofia Lundberg



Ei 98 år gamal kvinne lever aleine, med skype-kontakt med grandniesa i USA som høgdepunkt i livet. Boka går eigentleg mest ut på å fortelje om livet til denne kvinna, som har levd gjennom krig og dramatikk i Sverige, USA og Paris, mellom anna. Hadde eg sett omslaget, ville lykkeskrifta og kvinna som er avbilda bakanfrå ha forklart meg litt om sjanger, men eg syntest boka var ganske underhaldande, om enn sentimental til tider. 

Bok 67 2021: "Verda er ein skandale - ei lita bok om livet på landet" av Agnes Ravatn


Forfattaren reiser frå Oslo saman med mann og barn for å bu eit halvt år på Vestlandet. Dei pussar opp eit hus, manglar internett og nyt vestlandsnaturen. Forfattaren tilbringer dessutan mykje tid saman med naboen, den eldre forfattaren Einar Økland. Boka er tankevekkjande og interessant, i alle fall viss ein kjenner litt til profil-generasjonen.

Bok 66 2021: "Lena fra Tysfjord" av Anne-Britt Harsem


Harsem har tidlegare skrive ei bok om overgrep i Tysfjord, der ei jente fortalde historia si om korleis ho hadde blitt misbrukt av fleire menn i det lulesamiske, læstadianske miljøet i bygda. I denne boka følgjer vi mora til denne jenta, og vi får òg innsyn i lulesamane si historie, der fornorskingsprosessen, mobbing og religiøsiteten står i sentrum. Boka er kanskje litt sentimental til tider, men den er ei slags forklaring på korleis eit lokalsamfunn kan utvikle seg når storsamfunnet vert den store fienden.

Bok 65 2021: "For du stjal min lille venn" av Sophie Hannah


Ei kvinne har gifta seg med draumemannen, og gleda er stor over å ha blitt teken vare på av mora hans, som bur saman med dei. Vi føgjer kvinna, men mest følgjer vi etterforskarane som blir kjende med henne då ho melder babyen sin sakna. Ho har nyleg fødd eit barn, og ho har eit barn heime hos seg, men ho påstår at dette er eit anna barn. Boka e spennande, om ikkje så realistisk, og det var god underhaldning å lese denne boka.

Bok 64 2021: "I vargens tid" av George R.R. Martin

Eg har sett serien "Game of Thrones", og eg har lenge tenkt at eg skulle lese bøkene. Fantasy er ikkje min favorittsjanger, truleg fordi eg manglar fantasi, men eg har tidlegare sett at eg har likt ei bok dersom eg såg filmen/serien først. No ligg bøkene på Storytel, og eg gav første boka ein sjanse. Den var heilt ok, men det freista ikkje å lese vidare.

Bok 63 2021: "Et liv forbi" av Helga Flatland


Dette er ei nydeleg bok om ei vaksen dotter og mora hennar, og om forholdet mellom dei. Mora har fått ein alvorleg diagnose, og vi får høyre om korleis livet hennar har vore prega av at mannen har vore sjuk i lang tid. Boka vekslar mellom å følgje desse to kvinnene, og på lydboka les to ulike skodespelarar. Boka er veldig god, men òg vemodig og vond å lese.

Bok 62 2021: "Misterioso" av Arne Dahl


Eg likar godt å finne (for meg) nye krimforfattarar; spesielt når dei har skrive svært mange bøker. 

I denne boka blir ei rekke finansmenn tekne livet av, og mykje tyder på at det er nokon som hemnar seg. Men kven, og kvifor? Boka blir ei stund stadig meir spennande, men etter mitt syn ramlar den saman med ein litt keisam slutt.

Det er ingen som tvingar meg til å lese flire bøker av same forfattar, så det står att å sjå. Eg er i tvil.

fredag 19. november 2021

Genser nummer 16: Mariusgenser til Minstemann

Dette strikkeprosjektet har måtta vike for andre prosjekt innimellom, men det vart no ferdig til slutt. Resultatet vart reint vellukka, vil eg seie, og genseren passa guten både i storleik og stil. Fargen viste seg å passe betre enn frykta, då guten overraska med ny hårfarge.


fredag 15. oktober 2021

Genser nummer 14: Tirilgenser til Veslejenta


Dette var den første Tirilgenseren eg strikka, i storleik small med pinnar 2,5 og 3. Garnet er Sandnes Alpakka, fargen er lys lilla. Storleiken var om lag lik med den eg strikka til Eldstejenta, der eg brukte ein storleik mindre, men tjukkare pinnar. Eg har lyst til å strikke ein slik genser til meg sjølv, men har eit par, tre andre prosjekt òg. 

Veslejenta kom heim på haustferie nokre dagar, og det var sjølvsagt kjekt av fleire andre årsaker enn at ho fekk seg ny genser. Eg har ikkje tørna heilt.

Bok 61 2021: "Hør her'a" av Gulraiz Sharif

Dette er verkeleg ei fin bok som godt kunne ha blitt lese i skulesamanheng, tenkjer eg. tenåringsguten Mahmoud lever i ein familie med mor, far og ein veslebror som vil vere jente. Foreldra har innvandra til Noreg frå Pakistan, og familien vert noko stereotypisk skildra med ein far som arbeider alt han kan, og som stadig held på verdiar og haldningar frå gamlelandet. Dette vert forsterka når broren hans kjem på ferie frå Pakistan. 

Det om først og fremst er bra med boka, er skrivemåten. Syntaks og ordforråd etterliknar drabantbyspråket i Oslo, og det er fornøyeleg direkte og frå ein for meg noko ukjend synsvinkel når det gjeld omtale av det pakistanske miljøet og skildring av det norske samunnet. Innlesaren gjer ein fantastisk jobb med å levandegjere språket og karakterane. Denne boka er verkeleg ei "løp og les"-bok.

Bok 60 2021: "Unlimited Power" av Tony Robbins


Eg er ingen storlesar av sjølvutviklingsbøker, men igjen var det ein elev som skulle fordjupe seg i boka, og eg ville gjerne vite meir om den. Robbins er visstnok ein kjend førelesar og forfattar, berre sjekk youtube, og han har ein del interessante og gode idéar til korleis ein kan tenkje om livet sitt. Sidan eg las boka av jobbmessige årsaker, er eg kritisk til mykje av det han skriv, men eg har òg sansen for ein del av forenklingane og retorikken. Det gir ei positiv og konstruktiv haldning til å få til noko i livet, og det tenkjer eg alle kan ha bruk for innimellom.

Bok 59 2021: "Arven etter Arn" av Jan Guillou

Denne boka handlar om tida etter at Arn er død, og er dermed litt mindre interessant dramatisk sett. Likevel er det greitt  ha lese den òg, sjølv om det vart mykje maktkamp og kriging og lite anna i denne fjerde boka i serien. Serien er filma, i alle fall noko av den, og ved høve skal eg få med meg desse òg. Det er kjekt å lære historie gjennom historier.

Bok 58 2021: "Riket ved veiens ende" av Jan Guillou


I den tredje boka om Arn er han attende i Sverige, og boka handlar mykje om maktkamp og utvikling av metodar, avvikling av slaveri og liknande. Arn er sjølvsagt den store helten, men også andre går føre i utviklinga. Tanken slo meg medan eg las at eg kan veldig lite om svensk historie, mykje mindre enn til dømes britisk hitorie. Å lese slike bøker som dette kan gi ein noko innsyn på ein lettlesen måte.

Bok 57 2021: "Tempelridderen" av Jan Guillou

Som tittelen røpar, er Arn no tempelriddar, og i Midtausten utrettar han mykje, mellom anna gjennom ein venskap med fienden Saladin. Dette er ein del av historia eg ikkje har lese mykje om før, så den historiske delen av boka er interessant.

Bok 56 2021: "Veien til Jerusalem" av Jan Guillou


Serien om Arn er ein bokserie eg lenge har tenkt eg skulle lese, og no fekk eg eit påskot i og med at ein elev skal skrive fordjupingsemne i norsk om bokserien. Handlinga er lagd til om lag år 1200, og det meste av handlinga går føre seg i dagens Sverige.

I første bok vert vi kjende med barnet Arn, som overlever ei ulukke ved eit mirakel, og som det dermed vert knytt store forventningar til sidan Gud tydelegvis har ein plan med livet hans. Han vert opplært i eit kloster og blir både språkmektig, flink til å synge og flink til å slåst. Vel ute av klosteret er han klar til å starte eit verdsleg liv, men lagnaden ønskjer det annleis. 

onsdag 13. oktober 2021

Oslotur

Sidan eg hadde fri fredag, sette eg meg på nattbussen allereie torsdag kveld, så vi fekk ein lang og kjekk fredag i storbyen. Eldstejenta og venninna har delt bustad i fleire år, men flytta nyleg inn i ei fin og nyoppussa leilegheit i Biermannsgate på Grünerløkka, og der var det plass for Gamla å overnatte. 





Fredag vart Nobels fredsprisvinnar kunngjort, så vi tenkte det var passande å gå til Aker brygge og stikke innom Nobelsenteret. Det var sant å seie ikkje så mykje å sjå der, men det var ein hyggeleg ting å gjere for å markere dagen. Deretter åt vi ein liten lunsj, før vi tok trikken "heim" til heimebaka eplekake og is. Det pøsregna, men letta heldigvis ut på kvelden. då hadde vi billettar til framsyninga "Stardust" med Hilde Louise Asbjørnsen. Det var ei flott  framsyning med interessant innhald og fin musikk. Kvelden vart avslutta med middag på indisk restaurant, og då vi kom heim, var vi så trøytte at vi tok tidleg kveld.










Laurdag tok vi trikk til Kjelsås, og så gjekk vi tur nedover langs Akerselva. Eg hadde blitt anbefalt Hønse-Lovisas hus, der caféen "Anne på Landet" ligg. Der kunne vi sitje ute og nyte nydeleg haustvêr like ved elva, og så kjøpte vi oss vaflar og kaffi. Caféen låg berre nokre få minutt frå leilegheita deira, så jentene kjem nok til å fare attende til denne koselege staden. Denne kvelden vart det sushi og kino, og det var både kjekt og trist, sidan filmen var "Ingenting å le av".













Søndag rusla vi ein tur til Arbeidermuséet, som låg like ved, på Sagene. Deretter gjekk vi ein lang tur for å leite opp statuen av Bokken Lasson ei av kvinnene Hilde Louise Asbjørnsen hadde nemnt i framsyninga på fredagen. På veg dit gjekk vi også gjennom Vår Frelsers gravlund, der vi leita opp nokre kjendisar. Eg er som kjent glad i gravplassar, så eg syntest det var hyggeleg. Vi passerte dessutan Kunstnernes hus, så då stakk vi innom Høstutstillingen. Til middag møtte vi ei anna venninne av Eldstejenta som eg møtte i Trondheim for tre år sidan, og denne dagen fann vi ein mathall der vi kunne velje mellom mange ulike rettar. Eg landa på indisk denne dagen òg. Desserten tok vi på caféen "My Ugly Baby", der dei har fantastiske donuts. 



Søndag kveld sette eg meg på bussen heim, etter ei innhaldsrik og triveleg helg. Det var fire år sidan sist eg var i Oslo, trur eg, så det var på høg tid. 







Genser nummer 15: Tirilgenser til Eldstejenta

Ein søndag snakka eg med Eldstejenta på telefon, og vi vart samde om at eg skulle kome til Oslo den helga ho var ferdig med ferien og eg skulle til å begynne på min. Etter samtalen la eg opp brotet til ein genser eg hadde lyst til å ha med nedover 2 1/2 veke seinare, og så fekk eg nokre travle dagar. Nøyaktig to veker seinare monterte eg genseren og festa alle trådar. deretter vaska eg den og la den til tørk, så då hadde eg ei fin gåve å ta med då eg kom på besøk. 

Det er fleire genserar med same namn, men denne er strikka i Sandnes Alpakka på pinnar nummer 3 og 3,5. Fargen heiter isturkis, men det ser ut til at den no har skifta namn til havbris. Genser nummer 14 er ein av same sort, men det biletet kjem seinare, når modellen har fått den på. 


tirsdag 5. oktober 2021

Genser nummer 13: Hopi til meg sjølv

Biletet er ikkje all verda, men her er altså genseren eg fekk garn og mønster til av Systa til bursdagen min. Genseren var veldig kjekk å strikke, og garne


t var Hillesvåg og veldig god kvalitet å halde på med.

fredag 10. september 2021

Bok 55 2021: "Tollak til Ingeborg" av Tore Renberg


Renberg er ein av mine favorittforfattarar, og det er spesielt kjekt å høyre han lese bøkene sjølv. Det gir rett og slett bøkene ein ekstra dimensjon, vil eg påstå. I denne boka møter vi Tollak, ein aldrande mann som etter konas død ergrar seg over tidene som endrar seg. Etter kvart forstår vi at det ligg meir alvor bak enn det verka som i starten. Dette er rett og slett ei utruleg god bok.

Bok 54 2021: "Darkness and Light" av John Harvey


Etterforskar Elder hugsar si første, uoppklarte sak for Nottinghampolitiet, der ei kvinne vart funne myrda. Fire år seinare kontaktar ekskona han fordi ei kvinne har forsvunne, og denne kvinna vert seinare funne i same positur som ho i den uoppklarte saka. 

Dette var den siste boka i serien som låg på Storytel, og det er like greitt, tenkjer eg. Boka vart noko stilleståande etter min smak, og eg vart lei av den før eg hadde lese den ut, noko som ikkje er eit godt teikn.

søndag 22. august 2021

Genser nummer 12: Mariusgenser med rundfelling til Veslejenta

Før ferien la eg opp for å strikke bolen til denne genseren, som eigentleg skulle vere til Minstemann. Etter om lag 10 cm såg eg at det heile vart frykteleg stort, og eg rekte opp att og begynte på nytt, med tynnare pinnar om mindre storleik. Ved eit ulukkestilfelle gjekk eg ned to storleikar i staden for ein, og dermed fekk Veslejenta ny genser. Garnet var veldig mjukt og fint å strikke i, og det heiter Sandes alpakka. Fargane er ein mellomgrå, kvitt og blått. Seinare skal eg strikke Tirilgenser i same mønster, og det dukkar truleg opp fleire Mariusgenserar òg, sjølv om eg synest det er irriterande med oppskrifter der det står "reduser jamnt 23 masker i denne omgangen", i staden for å ha fullstendige mønsterskjema. No håper eg berre at jenta vil bruke genseren mykje, og så får eg spekulere på om eg skal legge opp to storleikar større til broren. Eg trur eg vil halde fram med å bruke tynnare pinnar, for mønsteret vart ganske pent strikka på den måten.


Bok 53 2021: "Ash and Bone" av John Harvey


Eg valde å lytte til denne boka på engelsk, for å få noko språkleg fornying og litt meir lærdom av ei krimbok. Sjølve forteljinga er litt rotete, for her er fleire ulike saker som vert omtala. Sentralt står eit mord på ei politikvinne som har vore ute og gått aleine om kvelden då ho vert angripe, valdteke og myrda. Boka er ikkje det mest spennande eg har lese, må eg innrømme.

søndag 15. august 2021

Bok 52 2021: "Av kjøtt og blod" av John Harvey


Harvey er ein ny forfattar for meg, og denne boka er den første i ein serie om ein detektivhelt. Elder er ein tidlegare politimann som er skild og har reist til Cornwall for å kome seg vekk frå det heile. Her plagast han stadig av mareritt om kattar, og han reiser etter kvart nordover for å granske ei forsvinningssak som han ikkje vart ferdig med for nokre år sidan. Eit tidlegare drap, ei forsvinning og eit nytt drap står sentralt i handlinga. Handlinga var kanskje ikkje så godt komponert, men eg likte å lese om område i England som eg har besøkt sjølv for mange år sidan, som til dømes Whitby. 

Som sagt er dette første bok i ein serie, og av ein eller annan grunn finst resten av serien med engelsk språk, men ikkje denne. Viss eg skal lese fleire bøker i serien, blir det på originalspråket. 

Genser nummer 11: Setesdal med rundfelling til Storegut


Etter å ha strikka ein del med tjukke pinnar, fekk eg lyst til å prøve noko litt annleis. Setesdalsgenseren er finare med isette erme, men det er uaktuelt for meg å begynne med større syprosjekt - dermed blir det rundfelling over heile linja. Storegut ønskte seg ein turkis genser, og denne fargen er verkeleg fin. Garnet var Viking alpaca fine, noko som vart veldig tynt og gjekk seint å strikke. Mønsteret tok si tid, men med berre to fargar var det lite trådfesting etterpå. Eg var spent på størrelsen, men den var så godt som perfekt. Genseren er relativt tynn og mjuk, og eg håper den blir mykje brukt.

Bok 51 2021: "Hallo verden - hvordan være menneske i en verden styrt av datamaskiner?" av Hannah Fry

Denne boka plukka eg opp på slump. Eigentleg synest eg tematikken er så overveldande at eg ikkje ville lese om det, men heller sjå dokumentarar og liknande, men boka er faktisk både lettlesen og underhaldande. Temaet er algoritmar og korles de kan brukast og misbrukast. Dette var langt meir interessant enn det kan høyrast ut, og ein får høyre mange historier som illustrerer poenga. Boka kan anbefalast på det sterkaste, også av slike som meg, som flakkar med blikket  av tekniske forklaringar.

Bok 50 2021: "Er mor død" av Vigdis Hjorth


Forfattaren les denne boka sjølv, og det er ei god bok om sjølvgransking og ønske om oppgjer mellom menneske som har brote med kvarandre for tretti år sidan. Eg trur eg hadde likt boka betre dersom eg ikkje hadde kjent til forfattarens strid med eigen familie, slik det har vore fokusert på i media. Det var dessutan slitsamt å lese om desse problema, for boka er sterk og tankevekkjande, sjølv om problematikken er temmeleg fjern i mitt eige liv.

Bok 49 2021: "Bakom synger døden" av Karin Fossum


Ei ung jente vert funnen død, og ein ung gut vert seinare òg funnen død. Ei mor finn ei skremmande teikning på rommet til sonen, og teikninga syner at han har vore på drapsstaden. Sakene heng kanskje saman, men forklaringa må halast fram. Igjen bruker Fossum mest tid på å vise kvifor nokon tek livet av andre, sjølve drivkreftene bak brotsverka. Dette var ei svært god bok.