Jallakoff 2024

Storegut deltok også i år på Jallakoff, den heilt lokale festivalen som vart starta opp i koronaperioden. Også i år samla det gamle bandet Lommerosk seg, noko som er naturleg i og med at fleire i bandet er med og arrangerer. Det er i år 10 år sidan dei kom til landsmønstringa i UKM i Trondheim, etter å ha kome vidare til fylkesmønstringane tre år på rad. Rart å tenkje på at to av dei no bur i Trondheim, og at fleire av dei framleis driv med musikk trass i andre yrke. Tre av dei er til dømes lærarar. Det var uansett kjekt å høyre både dei og dei yngre banda, med medlemer som no er eller skal bli elevar på musikklinja, der Lommerosk var legendariske. Det var tydeleg å sjå beundring blant dei yngste, og eg tenkte på kor viktig det er å ha gode førebilete - og å vere gode førebilete, for den saks skuld.

Jallakoff 2023

 I år vart det på nytt arrangert Jallakoff, og blant musikantane på scenen var mine to søner. Den yngste spelte med bandet sitt, Bask, og den andre spelte saman med sitt gamle band Lommerosk og sitt nye band Poor Rick. Det kom mellom anna eit par trønderar frå dette bandet som budde hos oss medan festivalen vart planlagd og gjennomført. Poor Rick hadde ikkje med bassisten sin, så der steppa Minstemann inn. Eg fekk med meg noko av konsertane, og det var rett triveleg.

Sommarfest på Straumshamn

Laurdag var det duka for årets sommarfest i bygda. Det vart arrangert fotballturnering, hesteskokasting, natursti og kunstutstilling på dagtid, og fest med inkludert konsert på kveldstid. Minstemann og eg deltok berre i første del av festen, då det var aldersgrense på del 2. Bear.Inc spelte, og om kvelden spelte Lommerosk.

Middagen tok vi ute denne laurdagen, sidan det vart servert deilig grillmat.

Bileta er tekne før folka kom - det var bra oppmøte både på dag- og kveldstid.

Fosnavåg Rock 2015

Lommerosk skulle spele på festival, og mor og søsken drog dermed på festival. Ja, der var fleire som spelte òg, og eitt av dei andre høgdepunkta var Dum Dum Boys. Ein nydeleg kveld ute i havgapet, og vi fekk sjå solnedgangen frå kaia. Eg kan elles legge til at Eldstejenta fekk lærekøyre til og frå. Vi håpar på at ho skal klare å gjere seg ferdig med sertifikatet i løpet av sommaren.

Torsdag i Trondheim

Vår Frue kirke

Opning av den store korpshelga i Trondheim

Torsdag fekk vi meir tid til sightseeing og byvandring, men det viktigaste var sjølvsagt å få med seg landsmønstringskonserten i Olavshallen. Korpset vart for seine til å få med seg den hendinga, men dei fekk høyrt gutane spele på caféen "Coffee Annan" om kvelden.

Opning av "Snippeholmen"

Midt i sensur og ballett fekk vi heldigvis tid til å høyre Lommerosk vere med på opninga av det nye uteområdet "Snippeholmen" i Volda. Det var utdeling av bollar og kaffi, tale ved ordføraren og akrobatikk for å setje fokus på opninga. Eg får ta bilete ein gong der er tomt for folk, så de får sjå kva som vart feira.

Lommerosk klar for landsmønstring

Det kunne ha vore den verste aprilspøken gjennom tidene, så eg vart glad med atterhald då Storegut fortalde at han hadde blitt oppringd frå UKM. Etter kvart som timane gjekk innsåg eg at han aldeles ikkje hadde lurt meg, men at Lommerosk har gått vidare til sjølvaste landsmønstringa i UKM. Den blir arrangert i Trondheim i slutten av juni, samtidig med at Veslejenta skal på korpstur til den same byen. Sidan Minstemann og eg hadde fått oss nokre dagar aleine heime, bestilte eg like godt hotell til oss slik at familien vert samla i Bartebyen. Det vil seie: samla blir vi neppe, men Minstemann og eg kan i alle fall få med oss både rockekonsert, korpsmusikk og kvalitetstid på eiga hand.

Lommerosk på fylkesmønstringa i UKM

Lommerosk for Tibet 10. mars

Måndag kveld skulle Lommerosk opptre på eit arrangement til støtte for Tibet, som vart okkupert av Kina for 55 år sidan. Sidan dei fleste i bandet er under 18, treng dei verge når dei skal opptre ein stad der det er skjenkeløyve, og eg er ikkje den som let sonen min vere vergelaus.

Der var to andre band på scenen, og det vart musikk i fleire sjangrar. Chocolate Moose spelte for det meste bluesaktig rock, medan My Descending Ark spelte litt eksperimentell rock. Dei stilte utan trommeslagar, sidan trommeslagaren spelte bass og bassisten låg på sjukehus, så det er litt vanskeleg å vite korleis musikken deira hadde vore med trommer til. Lommerosk kom sist på scenen, spelte mest og heldt eit supert show både musikalsk og når det gjaldt å "lage liv". Publikum tok godt imot dei, og vergen passa på at dei kom seg heilskinna ut dørene med æra i behald.

Lommerosk gjer hattrick

For tredje år på rad har Lommerosk gått vidare i UKM, denne gongen med songen "Clarify". Eg er sjølvsagt stolt som ei høne(mor), noko mora til bassisten også må vere. Hennar andre son gjekk nemleg òg vidare, saman med Jeki. I alt var det sju av ni sceneartistar som gjekk vidare som er frå vår side av fjorden.

1. mars: UKM i Volda

Laurdag var det tid for årets UKM i Volda, og Lommerosk deltok for tredje år på rad. Dei gjorde ein flott innsats, sjølv om lyden ikkje var optimal. Med på mønstringa var òg Jeki og Sander, som begge er elevar ved Folkestad skule, og dei var svært flinke dei òg. Etter mi høgst subjektive meining burde dei gå vidare, saman med til dømes dokumentarfilmen og trommesoloen, som eg meiner var blant dei absolutte høgdepunkta på årets mønstring. No ventar vi i spenning på resultatet.

Lommerosk på Battle of the bands

Kva høver vel betre enn å spele songen "Keep Battling" ved eit slikt høve? Det er ein av dei nyskrivne songane deira, og dei framførte i tillegg "Clarify" og "Hope". Innsatsen stod til siger!

Lommerosk og Space Truckers på Rokken

Laurdag kveld skulle Lommerosk spele support på Studenthuset Rokken. Då eg fekk vite at hovudattraksjonen for andre enn foreldra var eit band som skulle spele coverversjonar av Deep Purple, tenkte eg at det kunne vere verdt å få med seg det òg. Forventningane var sånn passeleg høge, for eg rekna med det ville bli nokre musikalske nedturar, men bandet var utruleg bra! Det var fantastisk flott å høyre att mange av dei gode, gamle songane, og spesielt vokalisten Leif Digernes imponerte stort.

Det var sjølvsagt stort å oppleve Lommerosk på scenen att, og denne gongen spelte dei nokre nye coverversjonar og eit par nye sjølvlaga. Responsen blant publikum var eintydig positiv, og eg overhøyrde ein del rosande ord blant folk som ikkje visste at eg var mora til vokalisten. Som den myrsnipa eg er ville eg ha likt dei uansett, men det er kjekt når andre òg set pris på talenta deira.

Malakoff rockefestival

Fredag var heile familien på Malakoff rockefestival på Nordfjordeid. Storegut reiste på eiga hand med bandet, som skulle opptre på konsert på dagtid. Det gjorde dei med stor entusiasme og talent, i alle fall i følgje foreldre-fanklubben. Bandet fekk billettar til heile helga, og dei ligg dessutan i telt på området. Akkurat det freista ikkje resten av oss, men Veslejenta fekk billett for heile helga. Resten av oss tok oss ein dag på festival og var nøgde med det.

Morten Abel imponerte stort med flott musikk og ein magisk scenesjarm. Sidan Minstemann er blodfan av Kaizers, ville han stå langt framme under konserten deira, men det var relativt traumatisk på grunn av pressing og skubbing. Eldstejenta og Gamla gjorde sitt beste for å verne han, men vi måtte gi opp til slutt. Musikken var sjølvsagt bra, men vi var litt skuffa over låtvalet, og sakna mange av favorittane våre.

Illustrasjonsfotoet er av Storegut og årets Idol-favoritt her i huset, den såkalla Idol-Eirik,

Sommarprat med Storegut

I dagens utgåve av lokalavisa Møre kunne ein på siste side lese eit intervju med Storegut:

Sommarkonsert i operahuset

Torsdag kveld gjekk turen til Nordfjordeid. Eid har sitt eige operahus, og det flotte lokalet gjorde sitt til at ein allereie før konserten var imponerte. Då konserten begynte, kom høgdepunkta som perler på ei snor. Musikantane og songarane hadde pynta seg, det vart minimalt med pausar mellom innslaga og alle nummera var så godt innøvd at det var ei fryd å høyre på. Nokre av utøvarane heldt dessutan eit så høgt nivå at eg sjeldan har høyrt liknande. Dei siste to nummera var sett saman av gitarar, blåsarar, strykarar, songarar med meir, og det var berre fantastisk å høyre på. Elles må eg legge til at konsertleiinga og rigginga verka utruleg profesjonell, og at lyssettinga gav konserten eit ekstra løft.

Årsaka til at vi var der, var at "Lommerosk" har delteke i rockeskulen på Eid. Dei framførte det dei sjølve kalla "basarrock frå Sunnmøre", og dei var sjølvsagt flinke og fekk flott mottaking. Nummeret dei spelte var gode, gamle "Social education".

Lommerosk på rockeskule

Her er ei lenkje til eit mediaoppslag om bandet Lommerosk. Dei går på rockeskule på Nordfjordeid kvar onsdag.

Lommerosk vidare frå UKM

Gleda er stor, for bandet der Storegut syng har gått vidare til fylkesmønstringa i UKM i år òg. Vi er mange som heiar på dei, både fordi dei er flinke, og fordi dei er ein herleg gjeng med kjekke gutar.

Gamla gratulerer!

UKM i Volda 2013

Laurdag var det endeleg tid for UKM i Volda, etter at nabokommunane for lengst har avvikla sine tevlingar. Frå bygda deltok fleire dansarar, vokalisten Jeki og rockebandet Lommerosk, der Storegut er vokalist. Det var mange talentfulle ungdomar med, og våre lokale stjerner var absolutt blant dei som bør ha sjanse til å kome vidare til fylkesmønstringa.

Lommerosk på radio

I dag vart "Social education" spelt på Nrk Møre og Romsdal, og bandet vart presentert. Eg fekk ikkje med meg sendinga, men har fått innhaldet referert.

Det er framleis mogleg å gå inn på "Urørt" og stemme på songen.