Dagen i dag begynte med ei roleg arbeidsøkt og litt romanlesing før ungane stod opp. Deretter spurte eg Minstemann om han ville gå tur eller jobbe i hagen, og han valde det siste. Han har rive ferdig leikarhytta, og i dag bar han vekk materialet til ein stad der det kunne dumpast. Min innsats var å sage greiner og små tre som har vakse opp i utmarka oppom huset. Planen min er å få rydda det området i løpet av sommaren, så kanskje finn eg ein måte å utnytte tomta betre på.
Vel inne att laga eg middag, som i dag var ris, bernaisesaus, steikt lauk, grønsaker og pølser. Eg trur det vart restar i dag òg, det vert det som regel. Eg synest det er kjekt å lage mat når eg har god tid, sjølv om det ikkje akkurat er gourmetmat som vert servert. Vi har handla inn varer som held seg ei stund, og kunsten er å variere.
Då vi var på butikken på fredag, syntest ungane eg kjøpte mykje mjølk, blant anna. Eg forsvarte meg med at det går med mykje mjølk viss ein lagar kvit saus, potetstappe eller risengrynssuppe, til dømes. Veslejenta sa då at eg aldri har laga risengrynssuppe som ho kan hugse, ho nekta nesten på at det er ein rett. Kanskje lagar eg akkurat det ein dag - i alle fall blir det sikkert potetstappe om ikkje så lenge.
Ingen kommentarer:
Legg inn en kommentar