Stylist

Eldstejenta har i lengre tid hatt ein draum: å få rette ut håret til si gamle mor. No har det i min oppvekst, kanskje særleg på 80-talet, vore sett på som stor stas med naturlege krøllar, og i min travle kvardag er ikkje frisyre det eg har prioritert mest, så rettetang har vel aldri vore i mine hender anna enn når eg ryddar etter nemnde eldstejente. I dag fekk ho frie tøylar med å vere stylist og ta seg av hår og sminke før eg for på fest. Vi beregna god tid, for pessimist som eg er, ville eg ha tid til å vaske håret på nytt viss resultatet vart heilt forferdeleg. Sjekk øyredobbane frå Krakow, forresten. Og ja: vi gjekk for pannelugg. Festen var til ære for ein kollega som snart vert 50, og det var mykje moro med meir eller mindre kulturelle innslag, mykje god mat og framfor alt god prat. Vi bygdisane reiste heim i 1-tida, men det tvilar eg på at dei hine gjorde. Ein fantastisk kveld til ære for ei livleg, morosam og omsorgsfull dame som vi på jobben set svært stor pris på.